Në prill statusi i Kosovës në Këshillin e Sigurimit.
(22.03.07 RV)Debati për Kosovën në Këshillin e Sigurimit do të fillojë në ditët
e para të prillit. Ndarjet në gjirin e 15 anëtarëve kanë bërë që diskutimi i parashikuar
për fundin e marsit të shtyhet në prill. Njëkohësisht në prill, kryesia e Këshillit
të Sigurimit kalon nga duart e jugafrikanit Dumisani Kumalo, në ato të përfaqësuesit
të Britanisë së Madhe, Emir Xhons Perri. Sipas agjensisë amerikane të lajmeve
AP, e cila ka arritur të sigurojë një sintezë të planit të Ahtisarit, ai u jep kosovarëve
pavarësinë reale në përfundim të periudhës së tranzicionit, gjatë së cilës qeveria
e Prishtinës duhet të plotësojë një seri kushtesh. Brenda 120 ditëve nga miratimi
i planit, Kosova duhet të votojë për një kushtetutë nën mbikqyrjen e një Përfaqësuesi
Ndërkombëtar Civil. Brenda 9 muajsh duhet të mbahen zgjedhjet e përgjithshme dhe ato
lokale. Plani parashikon edhe shpërndarjen e Trupave Mbrojtëse të Kosovës dhe krijimin
e një Force Sigurie me 2500 anëtarë aktivë e 800 rezervistë.
Shtetet
e Bashkuara të Amerikës janë të mendimit se çështja e Kosovës nuk paraqet precedent
për rajonet e tjera, sidomos për zonat e nxehta në territorin e ish-Bashkimit Sovjetik.
Në një tekst të botuar nga Departamenti amerikan i shtetit pohohet se Kosova është
një rast unik, i papërsëritshëm.
Ministri i jashtëm i Francës, Filip
Dust-Blazi arriti sot në Prishtinë, ku takohet me zyrtarët më të lartë kosovarë
dhe ndërkombëtarë. Temë e diskutimeve - plani i të dërguarit të Kombeve të Bashkuara,
Marti Ahtisari për statusin e Kosovës. Pas Prishtinës, Dust – Blazi viziton Beogradin
dhe Podgoricën.