Kosova: Moska i thotë "po" OKB-së vetëm nëse merren vesh Prishtina e Beogradi.
(21.03.07 RV)Moska do ta mbështesë vendimin e Këshillit të Sigurimit të OKB-së
mbi Kosovën vetëm nëse ai do të pranohet si nga Prishtina, ashtu edhe nga Beogradi.
Kështu foli sot ministri i jashtëm rus, Sergei Lavrov për agjensinë ruse të lajmeve
Itar-Tass. Sipas tij, çdo gjë varet nga pakoja me propozime që do të votohet në
Nju Jork. “Nëse ndonjë gjë nuk është e pranueshme për njërën prej palëve, do të jetë
e papranueshme edhe për ne”, shton Lavrov, pa marrë parasysh se nëse do të ishin marrë
vesh më parë, serbët e kosovarët nuk do të kishin pasur nevojë për Rusinë. Kujtojmë
se Ahtisari pati deklaruar se nuk ekziston një terren i përbashkët për dialog, prandaj
çështja e Kosovës i kalon Këshillit të Sigurimit.
Vjena edhe një herë qendër
diskutimesh për të ardhmen e Ballkanit. Me iniciativën e Institutit për Rajonin
e Danubit dhe Evropën Qendrore dhe të Nismës Ekonomike sot në kryeqytetin austriak
u mbajt një konferencë për Kosovën. Tri qenë fushat kryesore të shkëmbimit të opinioneve:
politika, ekonomia dhe shoqëria. Përveç specialistëve kosovarë, mes të cilëve Veton
Surroi, anëtar i ekipit të unitetit dhe kryetar i partisë ORA, në konferencë diskutuan
edhe përfaqësues të Bashkimit Evropian, të Agjencisë Austriake për Zhvillim Ndërkombëtar,
Bankës Botërore dhe të disa institucioneve të tjera ekonomike në Vjenë.