Ahtisari ka propozuar pavarësi për Kosovën, sipas "Le Monde".
(20.03.07 RV)I dërguari i OKB-së për statusin e Kosovës, Marti Ahtisari, në
raportin e tij konfidencial, dorëzuar Këshillit të Sigurimit, ka propozuar pavarësi
për vendin, njofton gazeta franceze “Le Monde”, e cila bën publike pjesë nga dokumenti.
"Pavarësia nën mbikqyrjen ndërkombëtare është opcioni i vetëm i zbatueshëm", nënvizon
ish-presidenti finlandez. Sipas gazetës, Ahtisari ka shkruar se pas 8 vjetësh,
"nuk është më e mundur të mbahet një administratë ndërkombëtare në vend”, por edhe
"ri-integrimi në Serbi nuk është rruga që duhet të ndiqet”. "Pavarësia - vazhdon i
dërguari i OKB-së - ofron garancinë e vetme kundër rrezikut të paqëndrueshmërisë”
dhe është “shansi i vetëm për një marrëdhënie të mundshme me Serbinë". Zyra e
Ahtisarit, nëpërmjet zëdhënësit Remi Durlò, është munduar sot të interpretojë këto
mendime të ish-presidentit finlandez si propozime për një pavarësi të kushtëzuar në
Kosovë, duke theksuar se vetë Ahtisari nuk e ka bërë publik raportin e tij. Dje,
gjatë mbledhjes së Këshillit të Sigurimit, ku u diskutua çështja e Kosovës, ambasadori
rus braktisi seancën, pasi shefi i UNMIK-ut, Joakim Ryker, në raportin e tij, u shpreh
në favor të pavarësisë.