Сёння больш, чым калі-небудзь, падрыхтоўка да Вялікадня азначае для хрысціянаў Ірака
«перажыванне мукі Хрыста», — сказаў у інтэрв’ю агенцтву Asia News біскуп Жак
Ісхак, халдэйскі дапаможны біскуп Багдада і рэктар семінарыі Babel College.
Сітуацыя ў краіне вельмі складаная, але, як запэўнівае біскуп: «Паміранне з Езусам
— гэта адначасова ўваскрашэнне з Ім», — пра што сведчаць натоўпы вернікаў, якія запаўняюць
хрысціянскія святыні Багдада. Babel College — адзіны тэалагічны універсітэт
Ірака, які належыць халдэйскаму патрыярхату. У сувязі з тым, што на працягу вось ўжо
трох гадоў у Багдадзе не спыняюцца сістэматычныя напады, крадзяжы і забойствы хрысціянаў
— як духоўных асобаў, так і свецкіх — у гэтым годзе універсітэт перанесены з Багдада
ў Анкаву (Курдыстан) на поўнач краіны. Біскуп Ісхак падкрэсліў, што Babel College
з’яўляецца месцам надзеі і месцам сустрэч не толькі халдэйскага Касцёла, але і сірыйска-праваслаўных
і асірыйскіх хрысціянаў, а таксама прадстаўнікоў іншых веравызнанняў Ірака. Студэнты
жывуць і працуюць разам ужо шэсць гадоў, што з’яўляецца «вельмі канкрэтным сведчаннем
экуменізму». Надалей няма планаў перанясення са сталіцы самога халдэйскага Патрыярхату.
«У Багдадзе вельмі складана, але пакінуць вернікаў, якія там застаюцца і адважна ў
вялікай колькасці прыходзяць на Літургію, было б саўдзельніцтвам у нанясенні апошняга
ўдару па супольнасці. Мы павінны там застацца, удзельнічаючы ў іх цярпенні. Яны патрабуюць
нас, і калі давядзецца памерці разам з імі, мы, святары і біскупы, гатовыя да гэтага»,
— запэўніў біскуп Ісхак. Хрысціяне ў Іраку не чакаюць, што сёлета Вялікдзень стане
часам асабліва моцных нападаў. «Мы ўжо прызвычаіліся да гэтага. Кожны раз на працягу
ўсяго года, калі мы выходзім з дома, то разумеем, што можам ужо не вярнуцца, але гэта
не можа стрымаць нас ад далейшага жыцця», — тлумачыць біскуп Ісхак. «Мы, хрысціяне
Ірака, жывем крыжам штодня, але паміранне з Езусам азначае таксама ўваскрашэнне з
Ім. Сёння больш, чым калісьці, мы сапраўды можам зразумець веліч Ягонай мукі», — падсумоўвае
біскуп.