Kisha respekton kompetencat e shtetit, por e ka për detyrë të mbrojë të vërtetën mbi
njeriun.
(16.03.2007 RV)Këtë theksoi sot Papa në audiencën me ambasadorin e ri peruvian,
Alfonso Rivero Monsalve, të cilin e priti në Vatikan për paraqitjen e letrave kredenciale.
Kisha, specialiste në humanitet, mëson se vetëm duke respektuar ligjin moral,
që mbron dinjitetin e njeriut, mund të sigurohen paqja dhe progresi i vërtetë shoqëror
– tha Benedikti XVI – dhe në vijim ripohoi se ajo do të vijojë të impenjohet që çdo
peruviani t’i respektohen të drejtat e tij të patjetërsueshme. Katolikët në Peru –
nënvizoi Ati i Shenjtë – duhet të bëhen tharm i mesazhit të krishterë në institucionet
shoqërore e në jetën publike, për të kontribuar kështu në ndërtimin e një shoqërie
më vëllazërore. Si kujtoi se globalizimi ndikon drejtpëdrejtë mbi njeriun dhe mbi
vlerat e tij - Papa i ftoi qeveritë dhe organizatat ndërkombëtare të punojnë për zhvillimin
e të gjithë popujve, duke u impenjuar për të mirën e përbashkët me frymën e vërtetë
të solidaritetit. Më pas ripohoi se Kisha i njeh kompetencat e shtetit në çështjet
shoqërore, politike dhe ekonomike, por pa harruar kurrë se detyra e saj, që buron
nga misioni ungjillëzues, është mbrojtja dhe përhapja e së vërtetës mbi njeriun. Nënvizoi
kështu se dinjiteti i njeriut dhe i jetës nga zënia, në mbarimin e natyrshëm, duhen
kujdesur e mbrojtur, ashtu si pohon edhe Kushtetuta peruviane.