Në pranga këshilltari i kryeministrit Çeku.

(12.03.07 RV)Në pranga këshilltari i kryeministrit Çeku. Policia e UNMIK-ut dhe Shërbimi Policor i Kosovës kanë arrestuar Jahja Llukën, zyrtar i lartë i Aleancës për Ardhmërinë e Kosovës dhe shumë i afërt me Çekun, sëbashku me Milazim Abazin, drejtor i Kasabankës. Sipas policisë, dyshohet se ata janë marrë me pastrimin e parave.


Shtetet e Bashkuara të Amerikës kanë shprehur mbrëmë keqardhjen për dështimin e bisedimeve ndërmjet delegacioneve të Kosovës dhe të Serbisë për statusin e Kosovës dhe kanë mbështetur planin e propozuar nga i dërguari i Kombeve të Bashkuara, Marti Ahtisari. "Bisedimet treguan se Beogradi dhe Prishtina mbeten në qëndrime diametralisht të kundërta", deklaroi Xhoan Mur, zëdhënëse e Departamentit amerikan të shtetit.


Në një intervistë për gazetën vjeneze “Die Presse”, kryeministri i Kosovës, Agim Çeku deklaron se ka pak gjasa që Rusia të përdorë veton ndaj planit të Ahtisarit në Këshillin e Sigurimit të Kombeve të Bashkuara. Nga ana e institucioneve të Kosovës, thekson ai, "nuk do të merren vendime të njëanshme" dhe "nuk do të bëhet asgjë që vë në rrezik partneritetin me bashkësinë ndërkombëtare".