E diela e tretë e Krezhmëve: Meditim

(10.03.2007 RV)Ti o Krisht, na zhduk çdo dyshim.
Gabohet ai që mendon
se Hyji Atë të kall frikë,
se di të përdorë mjerim e fatkeqësi
termete e thatësi
që të gjithë pushtetin t’ia kundrojmë;
e mburrja jonë, e krenaria jonë
përpara fytyrës së tij të bëhen pluhur,
e kryengritja jonë të shuhet,
e më dysh të thyhet vullneti ynë njerëzor.
Jo, jo, nuk është kjo fytyra e Atit tënd, o Krisht.
Ai është mirësi e mëshirë,
durim e dashuri.
Veç s’duhet të besojmë,
se do të na falë pambarim,
se do të na presë pafund
der’sa të pendohemi.
Dashuria jote e meriton
vëmendjen tonë,
vëmendje e përkushtim;
e meriton dhe të marrin një vendim.
Kush të do, o Zot,
nuk mund ta shtyjë pacak
çastin për ta pranuar ftesën tënde,
për të këputur çdo lidhje me mëkatin
për t’ nisur pa ngurrim,shtegun që çon në shëlbim!