(08.03.2007 RV)Rrugët e shenjtërisë janë të pafundme, e këtë e dëshmon më së
miri jeta tokësore e këtij shenjti të jashtzakonshëm. Huan Çiudad, i lindur në Montemoro-Novo,
pranë Evorës (Portugali) më 8 mars 1495, në moshën 8 vjeçare iku nga shtëpia e u ndal
në Oropeza të Kastilies së Re. Duke e parë fëmijën e panjohur, që bridhte i vetmuar,
njerëzit filluan ta thërrisnin Gjoni i Zotit. E ky emër i mbeti për gjithë jetën.
Për të fituar bukën e gojës, nisi të punonte si bujk e pastaj si bari. Më pas hyri
në ushtrinë e Karlit V, në radhët e së cilës luftoi për mbrojtjen e Vjenës së rrethuar
nga Sulltan Sulejmani II. Si mbaroi lufta, i shpenzoi të gjitha paratë që kishte
fituar, duke bredhur nëpër Evropë e deri në Afrikë, ku rifilloi të punonte si punëtor
krahu. Provoi, në vijim, punë të ndryshme, në vende të ndryshme, që nga shitësi shëtitës,
tek libërshitësi, deri ditën kur dëgjoi një predk të të Lumit Gjonit të Avilës. Braktisi
gjithçka, shiti libra e dyqan e deri veshjet e këpucët e nisi të lypte nëpër rrugët
e Granatës, duke iu drejtuar kalimtarëve me fjalët, që u bënë emblema e një institucioni
të ri të mirënjohur në gjithë botën: "Fatebenefratelli" - "Bëni mirë vëllezër!". Por
banorët e Granadës menduan se e mira më e madhe që mund t'i bënin, ishte ta mbyllnin
në çmendinë. Keqkuptim providencial. Në çmendinë Gjoni kuptoi se metodat që përdoreshin
për të mjekuar të sëmurët mendorë ishin jo vetëm të gabuara, por edhe të denja për
xhelatët. Kështu, sapo u lirua nga ky ferr, me ndihmën e disa bamirësve, themeloi
spitalin e vet. Ndonëse nuk merrte fare vesh nga mjekësia, u tregua shumë më i aftë
se mjekët në mjekimin e sëmundjeve mendore, duke përdorur metodën psikoanalitike ose
psikomatike, fare e panjohur asokohe. Kjo metodë do të përdorej vetëm katër shekuj
më vonë nga Frojdi dhe nxënësit e tij. Mjekimi i shpirtit ishte parakushti për
shërimin e korpit. Gjoni i Zotit i mblodhi bashkëpunëtorët e tij në një familje të
madhe rregulltare, duke themeluar kështu, urdhërin e Vëllezërve të Spitaleve, që njihet
më tepër si urdhëri "Fatebenefratelli"- "Bënimirë vëllezër".Ndërroi jetë pikërisht
atë ditë kur mbushte 55 vjeç, më 8 mars 1550. U shpall shenjt më 1690. Papa Leoni
XIII e deklaroi Pajtor të spitaleve e të atyre që punojnë për t'i kthyer shëndetin
të sëmurëve.