Besimtarët duhet ta ndihmojnë me shpirt e bamirësi veprimtarinë e Kishës: kjo është
porosia e Papës në audiencën e sotme me Rrethin e Shën Pjetrit.
(08.03.2007 RV)Të gjithë besimtarët
duhet ta mbështesin edhe materialisht veprimtarinë e ungjillëzimit - porositi sot
Benedikti XVI, duke pritur në Vatikan anëtarët e Rrethit të Shën Pjetrit për dorëzimin
e lëmoshës, që njihet me emrin “Oboli i Shën Pjetrit”. Delegacioni kryesohej nga kryetari,
don Leopoldo dei Duki Torlonia. Në fjalimin e rastit Papa vuri theksin mbi rëndësisnë
e bamirësisë ndaj nevojtarëve, në mënyrë të posaçme gjatë kohës së Krezhmëve. Në
kohën e Krezhmëve jemi të thirrur të lutemi, të agjërojmë, por edhe të tregohemi më
të vëmendshëm kundrejt vëllezërve, posaçërisht ndaj atyre që kalojnë çaste të vështira
e t’i ndihmojmë konkretisht me gjeste e veprimtari materiale e shpirtërore. Këtë nënvizoi
Papa, i cili ripohoi rëndësinë e nismave shekullare, siç është Oboli apo Lëmosha e
Shën Pjetrit: “Praktika e lashtë e Obolit të Shën Pjetrit, që në një farë mënyre
vërehet edhe në bashkësitë e para të krishtera, buron nga vetëdija se çdo besimtar
duhet ta mbështesë edhe materialisht veprën e ungjillëzimit e, njëkohësisht, duhet
t’i ndihmojë bujarisht të varfërit e nevojtarët, duke kujtuar fjalët e Jezusit: ‘Atë
që bëni për më të voglin e këtyre vëllezëve të mi, ma keni bërë mua”. E zhvilluar
në rrjedhë shekujsh – vijoi Papa – kjo praktikë kishtare iu përshtat kërkesave të
ndryshme të kohërave. Në historinë e Kishës – shtoi Ati i Shenjtë – ka pasur çaste
në të cilat mbështetja ekonomike që të krishterët i kanë siguruar Pasardhësit të
Shën Pjetrit, ka qenë shumë domethënëse, siç ka ndodhur në kohët e të Lumit Piu IX:
“Edhe në kohën tonë Kisha vijon ta përhapë Ungjillin e të bashkëpunojë për ndërtimin
e një shoqërie më vëllazërore e më solidare. E pikërisht falë edhe Obolit të Shën
Pjetrit, mundësohet përmbushja e misionit të ungjillëzimit e të përparimit njerëzor”.