(04.03.2007 RV)Sot Kisha katolike kremtoi të Dielën e dytë të Krezhmëve. Nesër, e hënë, Kisha do të kremtojë Shën Luçin I Papë, Shën Adrianin
martir dhe Shën Gjonin e kryqit, meshtar françeskan. Na kujtojnë se dashuria e mëshira
shkojnë krah për krah. Në se nuk e kuptojmë këtë, jo vetëm që nuk mund ta quajmë veten
bij të Hyjit, por rrezikohemi të meritojmë dënimin e përjetshëm. Prej këndej, të
lutemi me Psalmistin: “Na fal, o Zot, në mëshirën tënde!”. Liturgjia e festës
së Shën Rozës nga Viterbo, virgjër françeskane dhe Shën Koletës Boilè, themeluese
e klariseve të varfëra, të marten e ardhshme, na kujton sa i madh është ndryshimi
ndërmjet asaj që themi e asaj që bëjmë. Duke pasur për model Atin qiellor e për mësues
Krishtin, të mos harrojmë kurrë se duhet të sillemi si shërbëtori para zotërisë e
si nxënësi para mësuesit. Shenjtoret Perpetua e Feliçita, që do të kremtohen
të mërkurën, na kujtojnë se mbretëria e Hyjit ndryshon krejtësisht nga mbretëritë
e kësaj bote. Kush dëshiron të hyjë në të, duhet të ecë në udhën e shërbimit e të
pijë kelkun e mundimeve. Të enjten e ardhshme do të kremtohet Shën Gjoni
i Zotit, themelues i Kongregatës Fatebenefratelli, pajtor i të sëmurëve e i punonjësve
të spitaleve. Liturgjia e festës së tij na kujton se shijimi i të mirave të kësaj
bote jo vetëm që nuk na i siguron të mirat e jetës së amshuar, por përkundrazi, na
rrezikon t’i humbasim. Fati në jetën tjetër varet nga mënyra e përdorimit të të mirave
të kësaj bote. Shën Françeska romake, themeluese e Oblateve të Tor’ de Speki,
dyzet Martirët e Sebastes dhe Shën Katerina e Bolonjës, qëdo të kremtohen
të premten, na kujtojnë se mbretëria e Zotit realizohet në mënyra të ndryshme.
Në se e humbasim, faji nuk është i Zotit, por yni, që s’ ditëm ta fitojmë.Shën Simpliçi,
papë dhe Shën Gjoni Ogjilviè, meshtar jezuit e martir, që do të festohen të shtunën,
na kujtojnë se vëmendja e Jezusit për mëkatarët e shkandullon njeriun, i cili e mba
veten të drejtë. E prandaj shembëlltyra e Djalit Plëngprishës nuk e vë theksin mbi
këtë qëndrim, por mbi gëzimin për shpëtimin e birit të humbur e të rikthyer tek ati.