Në Vatikan përfunduan ushtrimet shpirtërore të Kuries Romake në praninë e Atit të
Shenjtë.
(04.03.2007 RV)Sivjet meditimet me temë “Kërkoni çka është lart, ku gjendet
Krishti ndenjur në fron në të djathtën e Hyjit, e jo çka është mbi tokë” u propozuan
nga kardinali Gjakomo Bifi, kryeipeshkëv nderi i Bolonjës. Ushtrimet shpirtërore,
që filluan të dielën e kaluar në Kapelën “Nëna e Shëlbuesit”, me kremtimin e Lutjeve
të Mbrëmjes, pasuar nga adhurimi i Eukaristisë, përfunduan dje me kremtimin e Lutjeve
të mëngjesit dhe me reflektimin përfundimtar, pas të cilit Benedikti XVI e falënderoi
predikatarin për anagogjinë, apo ftesën për t’i lartuar sytë nga qielli, që u bëri
të gjithëve gjatë kësaj jave. Papa kujtoi se në Meshën shenjte, para lutjes eukaristike,
besimtarët i përgjigjen çdo ditë ftesës ‘T’i lartojmë zemrat” me fjalët “i kemi te
Zoti’. E kam frikë – vijoi Papa - se kjo përgjigje shpesh herë është më tepër rituale
sesa ekzistenciale. Po ju – vijoi Ati i Shenjtë, duke iu drejtuar kardinalit Bifi
– gjatë kësaj jave na mësuat ta lartojmë vërtetë zemrën tonë, të ngrihemi lart, drejt
së padukshmes, drejt realitetit të vërtetë. E na dhatë edhe kyçin për t’iu përgjigjur
çdo ditë sfidave të këtij realiteti. Më pas Benedikti XVI pohoi se gjatë konferencës
së parë, në sa gjunjëzohej, pati vegimin e Krishtit të ngjallur, të rrethuar nga engjëjt
në fluturim. Mendova – vijoi Papa - se këta engjëj mund të fluturojnë sepse nuk i
tërheq forca e gravitetit të gjërave materiale të tokës, por forca e gravitetit të
dashurisë së Krishtit. Edhe ne - tha me bindje Benedikti XVI – mund të fluturojmë
në se, duke dalë nga graviteti i gjërave materiale, hyjmë në gravitetin e dashurisë
së Krishtit të ngjallur. E kemi hyrë këto ditë – pohoi Ati i Shenjtë - duke kujtuar
ndikimin e ushtrimeve shpirtërore, gjatë të cilave predikatari bëri diagnozën e saktë
të kohës sonë, në dukje shumë larg nga feja e nga Krishti, por plot pikpyetje, plot
me dëshirë për të gjetur të vërtetën në këtë botë, ku e vetmja përgjigje e vërtetë
është Krishti, i gjithëpranishëm pikërisht në kohën tonë. Kështu ju na ndihmuat
ta ndjekim më me guxim Krishtin e ta duam më shumë Kishën – tha Papa e në përfundim
e falënderoi përsëri predikatarin për realizmin, humorizmin, konkretësinë dhe teologjinë
e tij të guximshme, që do t’i shoqërojë të pranishmit jo vetëm gjatë javëve të ardhshme.
Kujtojmë se gjatë këtyre ditëve u ndërprenë të gjitha audiencat papnore, duke përfshirë
edhe takimin javor me besimtarët të mërkurën, 28 shkurt, të cilat rifillojnë.