Dita e pestë e ushtrimeve shpirtërore në Vatikan.

(01.03.2007 RV) “Nevoja e një ekleziologjie anagogjike” apo të mbinatyrshme, lidhur ngusht me mësimet e Shën Palit, ishte sot në qendër të meditimit të kardinalit Bifi.
Pas ngjalljes së Krishtit – tha predikatari i ushtrimeve shpirtërore – të gjithë jemi të thirrur të vështrojmë lart e ky është edhe kuptimi i fjalës anagogji. Një nga pikësynimet e veprimtarisë sonë baritore nga të cilat nuk mund të hiqet dorë – vërejti kardinali – është ta nxisim popullin e Zotit të jetë i gëzuar e krenar që i përket Kishës. Është një domosdoshmëri, që sot bëhet gjithnjë më urgjente. Në realitet gëzimi e krenaria kanë qenë gjithnjë të pranishme në bashkësinë e krishterë. Prandaj themi se duhet rizbuluar. Në meditimin e dytë, kardinali nënvizoi se në Letrat e Shën Palit, vegimi i Apostullit bëhet gjithnjë më shumë anagogjik, kapërcen çdo vizion historik e të dukshëm të Kishës, për të arritur tek realiteti mbinjerëzor. Dy figurat e Kishës në letrën drejtuar Efezianëve, lidhen ngusht ndërmjet tyre - tha predikatari - e në përfundim theksoi se nuk ka bashkësi njerëzore që mund ta quajë veten Kishë, në se nuk është, në radhë të parë, në bashkim me Krishtin.