(28.02.07 RV)Të burgosur fantazmë: 38 burra dhe një grua janë kapur nga CIA
amerikane gjatë këtyre viteve të luftës kundër terrorizmit dhe janë transferuar në
burgje sekrete. Me një letër drejtuar presidentit amerikan, Xhorxh Bush, organizata
Hjumën Rajts Uoç, e cila punon për respektimin e të drejtave të njeriut, zbulon identitetin
e këtij grupi dhe kërkon që të dalë në dritë e vërteta për të gjitha personat e kapura
dhe të mbajtura nga CIA, që nga viti 2001 e deri më sot. Organizata e ka hartuar listën
duke pyetur ish-të burgosur, autoritete lokale, avokatë dhe familjarë e duke kontrolluar
lajmet në vendet ku janë kapur këta persona. “Praktika e zhdukjes së njerëzve, duke
i mbajtur në burgje sekrete, pa asnjë proces ligjor, është kundër së drejtës ndërkombëtare.
Nëse këta persona janë përfshirë në aktivitete terroriste duhen akuzuar dhe çuar në
gjyq, jo zhdukur”, deklaroi Xhoan Mariner, një funksionare e Hjumën Rajts Uoç.