У Ватыкане пачаліся Рэкалекцыі Рымскае Курыі з удзелам Папы Бэнэдыкта 16
На заканчэньне сустрэчы з вернікамі, ў часе адгаварэньня Багародзічнае малітвы
“Анёл Гасподні”, Папа папрасіў іх малітваў у намеры рэкалекцыяў Рымскае Курыі, якія
з ягоным удзелам пачаліся у нядзелю 25-га лютага пасьля абеду ў Ватыкане. Рэкалекцыямі
кіруе кардынал Біффі, арцыбіскуп Балоніі. Тэму сёлетніх разважаньняў узяў ён з Пасланьня
Сьвятога Апостала Паўла да Каласыянаў: “шукайце таго, што на небе, дзе знаходзіцца
Хрыстос, што сядзіць па правай руцэ Бога. Імкніцеся да таго, што ў небе, не да таго,
што на зямлі”. Ватыканскія рэкалекцыі пачаліся Вячэрняю, што была адслужана ў Капліцы
“Рэдэмпторэс Матэр”. Штодня, ў гадзінах ад 9 да 18, запланавана малітву Ютраньні
ды Вячэрню і тры разважаньні. Духоўныя практыкаваньні закончацца ў суботу 3-га сакавіка.
У гэтым часе не будзе ніякіх аўдыенцый Папы, нават Агульнай Аўдыенцыі, што павінна
адбыцца ў сераду 28 лютага.