У Міляне праваабарончая асацыяцыя «Сябры дзяцей» правяла першыя публічныя дэбаты,
прысьвечаныя лёсу Вікі Мароз ды іншых беларускіх сіротаў, якім, паводле ўдзельнікаў
імпрэзы, адмоўлена ў праве на сям’ю. У рамках дэбатаў адбылася прэзэнтацыя кнігі «Марыя
і дзеці разладу. Выпадак у Кагалета». У дэбатах у Міляне ўзялі ўдзел прадстаўнікі
шырокіх колаў італьянскай грамадзкасьці — юрысты, унівэрсытэцкія выкладчыкі, псыхолягі,
журналісты, сем’і, якія дагэтуль штогоду прымалі ў сябе дома беларускіх дзяцей‑сірот. Усе
яны згодныя: драматычная гісторыя Вікі Мароз, пра якую апавядаюць аўтары новай кнігі,
не адзінкавая, галоўным на сёньня пытаньнем ёсьць наступнае: «Што трэба зрабіць, каб
гэтыя няшчасныя дзеці‑сіроты не зьяўляліся надалей падставай для міждзяржаўнага разладу?» У
часе імпрэзы прадстаўнікі італьянскіх сем’яў выказалі занепакоенасьць, што беларускія
сіроты ў выніку рашэньня ўладаў зноў не прыедуць — цяпер ужо на велікодныя вакацыі. «Мы
ўсе некалькі месяцаў шмат гаварылі пра беларускую дзяўчынку, аднак рэальна так нічога
і не зрабілі, — заявіў прэзыдэнт асацыяцыі «Сябры дзяцей» Марка Графіні. — Сёньняшнімі
дэбатамі мы хочам прыцягнуць увагу да парушэньня права беларускіх сірот жыць у сям’і».