(21.02.07 RV) Britania e Madhe do të reduktojë numrin e trupave në Irak, gjatë
muajve të ardhshëm. Sot, kryeministri Toni Bler deklaroi në parlament se ato do të
kalojnë nga 7.100 në 5.500 vetë. Ushtria britanike është e disllokuar në jug të Irakut.
Ndërkaq, në vend, 19 persona kanë gjetur vdekjen në sulme të reja në Bagdad e Nazhaf.
Sulm
i ri i izraelitëve në Territoret Palestineze. Një njësi speciale e ushtrisë vrau kreun
e Xhihadit islamik në Zhenin. Ndërkaq, përfaqësuesit e Kuartetit për Lindjen e Mesme,
ku bëjnë pjesë SHBA, Bashkimi Evropian, Rusia dhe OKB-ja takohen në Berlin për bisedime
të reja, që kanë për qëllim rifillimin e procesit të paqes ndërmjet izraelitëve dhe
palestinezëve. E pranishme edhe sekretarja amerikane e shtetit, Kondolica Rajs, e
cila do të referojë mbi rezultatet e mbledhjes së mbajtur në Jeruzalem me kryeministrin
izraelit Ehud Olmert dhe me presidentin palestinez, Abu Mazen.
Presidenti
i Iranit, Mahmud Ahmadinexhad ka deklaruar sot, në ditën e fundit të caktuar nga Kombet
e Bashkuara për ndalimin e programit bërthamor, se do të shkojë përpara me pasurimin
e uraniumit. Madje, Teherani do të vazhdojë këtë program edhe sikur t’i duhet të heqë
dorë nga projekte të tjera gjatë dhjetëvjeçarit të ardhshëm.