Benedikti XVI do ta kremtojë të Mërkurën e Përhime në Bazilikën romake të Shën Sabinës.
(20.02.2007 RV)Nesër është e Mërkura e Përhime, e me të fillojnë Krezhmët.
Sipas njoftimit të zyrës papnore të kremtimeve liturgjike, nesër paradite Papa do
të takohet me shtegtarët në audiencën e zakonshme të përgjithshme në Vatikan, ndërsa
pasdite do të shkojë në Aventin, ku do të kryesojë një takim urate në formën e “Stacioneve”
romake. Kremtimi do të fillojë me një çast lutjeje në Kishën e Shën Anselmit.
Më pas do të vijojë proçesioni drejt Bazilikës së Shën Sabinës, ku do të kremtohet
Eukaristia me ritin e përhimjes. Në Mesazhin për Krezhmët e këtij viti, të cilin
e komenton në mikrofonin tonë kryeipeshkvi Angelo Komastri, vikar i Papës për
Qytet-Shtetin e Vatikanit, Benedikti XVI i fton besimtarët t’i drejtojnë sytë nga
Krishti i kryqëzuar: Përgjigje: - Papa na e bën këtë ftesë, sepse është
themelore. I krishteri nuk mund të mos e shikojë të Kryqëzuarin, sepse pikërisht duke
ia ngulur sytë të Kryqëzuarit kuptohet sa i rëndë është mëkati. Kuptohet se mëkati
bën keq, bën keq deri në atë masë, sa shenjti, i drejti, zemërbuti, i përvujti, dmth
Hyji, duke hyrë në këtë botë, kryqëzohet, pikërisht sepse bota është e sëmurë nga
mëkati. Duke ia drejtuar sytë të Kryqëzuarit, ne ndjejmë ftesën për t’u penduar. Nga
ana tjetër, kur e kuptojmë sa i rëndë është mëkati, në se Zoti nuk do të na dërgonte
edhe një mesazh tjetër, do të ishim në rrezik të humbisnim guximin, pikërisht duke
shikuar të Kryqëzuarin e pasojat e mëkatit. Po Zoti na kujton se është gati të na
falë, Zoti të do deri në atë pikë, sa e lë veten ta kryqëzojnë, sepse dëshiron të
të thotë se, pavarësisht nga mëkati yt, Hyji të do dhe është gati të të përqafojë
e të rifillojë, së bashku me ty, gjithë rrugën e pendimit, që të çon tek Ai. Pyetje:
- Benedikti XVI kërkon edhe që t’i jetojmë Krezhmët si kohë eukaristike. Si mund
ta mishërojmë këtë kërkesë në jetën tonë të përditshme? Përgjigje: - Eukaristia
është Kalvari mes nesh. Eukaristia është i Kryqëzuari, i pranishëm në jetën tonë të
përditshme. Atje e takojmë konkretisht Jezusin. Atje e takojmë me forcën që rinon
e që shëron. Kush e jeton Eukaristinë, mund të jetë i sigurtë se ecën në rrugën e
shenjtërisë. Eukaristia është buka që shenjtëron, Eukaristia është buka që pastron,
buka që rinon shpirtin e bën të lindë në të shenjtëria. Pyetje: - Mesazhi
papnor i Krezhmëve të këtij viti përqëndrohet tek dashuria e Zotit. E Benedikti XVI
kujton pikërisht eros-in e Hyjit për njeriun… Përgjigje: - Duhet
ta kuptojmë mirë ç’do të thotë eros-i i Zotit. Papa, që është njohës i hollë dhe i
thellë i Shkrimit Shenjt, e di mirë se në të gjithë Besëlidhjen e Vjetër, e edhe në
Ungjill, nënvizohet pikërisht dashuria e thellë e Zotit për njerëzimin, edhe pse njerëzimi
vijon ta plagosë Zotin, ta fyejë Zotin. Në Kapitullin e 11-të të Librit të Ozesë Profet,
lexojmë: “Kur Izraeli ishte djalë, unë e doja, e prej Egjiptit e thirra birin tim.
Por sa më shumë i thërrisja, aq më tepër largoheshin prej meje. E unë i mbartja para
duarsh, po ata s’e kuptonin se për ta kujdesohesha”. Njerëzit largohen nga Zoti e
megjithatë ai vijon t’i dojë e të thotë: “Si të heq dorë prej teje, Efraim. Zemra
ime në mua përmallohet; dhimbja ndizet flakë brënda meje. Nuk do ta shfrej zemërimin
tim, s’do të kthehem ta shkatërroj Efraimin, sepse jam Zot e jo njeri”. E Zoti nuk
ka as hijen e hakmarrjes. Zoti është vetëm dashuri, dashuri e tillë, që nuk zhduket
as kur njeriu e fyen. Edhe atëhere Zoti dëshiron kthimin e njeriut në bashkim me
të. Të njëjtën gjë e gjejmë edhe në Ungjill, kur njerëzit ankohen se Zoti rri e madje
edhe ha me mëkatarët, gjë që është shenja më e lartë e bashkimit të njeriut me njeriun.
Njerëzit shkandullohen e atëherë Jezusi thotë: “Në qiell do të ketë më shumë gëzim
për një mëkatar që pendohet e kthehet, se për nëntëdhjetë e nëntë të drejtë, që s’kanë
nevojë të kthehen”. Atëherë mund të themi me plot gojën se Zoti është si bariu. Delja
ikën, po Zoti nuk thotë: “S’më bëhet vonë fare e s’e kam ndër mend të shkoj e ta kërkoj.
Kam dele të tjera, pse të lodhem për një që humbi?”. Ky është misteri i bukur i Hyjit,
që e njeh vetëm krishterimi.