Myftiu dhe Ipeshkvi Katolikë i Kosovës thërrasin qytetarët në ruajtjen e paqes e të
punojnë për të mirën e Vendit.
(17.2.07.RV) Me rastin e vizitës që Ipeshkvi i Ipeshkvisë së Kosovës, Imzot
Dodë Gjergji me bashkëpunëtorë i bëri Myftiut të Kosovës z. Naim Tërnava, në selinë
e Kryesisë së Bashkësisë Islame të Kosovës në Prishtinë, në mes tjerash u bisedua
edhe për gjendjen e sigurisë në Kosovë, pas ngjarjeve tragjike të 10 shkurtit.
Si rezultat i këtij takimi, i cili u zhvillua në një atmosferë respekti të ndërsjelltë
dhe të marrëdhënieve tradicionalisht të mira në mes dy bashkësive fetare, dy udhëheqësit
shpirtëror të Kosovës vendosën t’u drejtohen qytetarëve me këtë:
Apel
1. Të gjithë jemi dëshmitarë se Kosova po kalon nëpër një fazë vendimtare
në historinë e saj më të re, andaj është obligim i të gjithë atyre, të cilët ia donë
të mirën Kosovës dhe popullit të saj të japin kontributin e tyre, që në Kosovë të
mbretërojë qetësia, stabiliteti dhe të ruhet rendi dhe të respektohet ligji.
2.
Ne i kuptojmë shqetësimet e qytetarëve për të ardhmen e Kosovës, madje edhe të drejtën
për të shprehur mos kënaqësitë, por pa përdorur dhunën.
3. Ftojmë të gjithë
që të ruajnë qetësinë, për të cilën Kosova ka nevojë më shumë se kurrë më parë. Duhet
të kemi besim në institucionet vendore dhe ato ndërkombëtare, se do të vëhen në shërbim
për implementimin e vullnetit të popullit.
4. Apelojmë tek institucionet përgjegjëse,
që për hir të së vërtetës dhe të drejtës, si dhe të vet kredibilitetit të tyre, sa
më parë të zbardhin faktet e ngjarjeve të fundit.
5. Familjarëve që tragjikisht
humbën më të dashurit e tyre u shprehim ngushëllimet tona më të sinqerta dhe e lusim
Zotin që shpirti i tyre të prehet në paqe.
6. Apelojmë tek të gjithë, që të
mbizotërojë arsyeja, vetëpërmbajtja dhe besimi për një të ardhme më të mirë për të
gjithë qytetarët e Kosovës.