Parlamenti i ri serb diskuton rezolutën mbi Kosovën.
(14.02.07 RV) Është mbledhur
sot parlamenti i ri serb, i cili përcakton platformën për Ekipin negociator të
Beogradit në bisedimet e Vjenës për statusin e Kosovës. Qeveria në largim dhe kisha
ortodokse serbe mbrëmë kanë kërkuar që deputetët të hedhin poshtë të paktën pjesërisht
propozimin e të dërguarit të Kombeve të Bashkuara për statusin e Kosovës, Marti Ahtisari.
Sipas tyre, plani cënon integritetin territorial të Serbisë. E vetmja parti që pranon
se Kosova është jashtë kontrollit serb që nga viti 1999, duke hapur kështu një spirale
shprese për shkëputjen e saj nga Serbia, është partia Liberal-demokratike, që nuk
ka shumë deputetë në parlament.
Sekretari i përgjithshëm i NATO-s, Jap
de Hop Skefer ka dënuar çdo formë të demostratave të dhunshme, sepse kjo dëmton
procesin e ndërlikuar të zgjidhjes së statusit të Kosovës. Skefer i bëri këto deklarata
pas takimit me kryeministrin maqedonas, Nikolla Gruevski në Bruksel. "KFOR-i është
atje që të mbrojë edhe pakicën edhe shumicën", ka deklaruar kreu i NATO-s, por ka
tërhequr vemendjen se "askush në rrugët e Prishtinës apo të Beogradit të mos kujtojë
se dhuna mund të ndihmojë në zgjidhjen e problemeve". Kryeministri maqedonas Gruevski
ka deklaruar se Shkupi i përcjell me vemendje zhvillimet në Kosovë dhe se mbështet
propozimet e Ahtisarit. Për Maqedoninë zgjidhja e problemit të Kosovës ka rëndësi
të veçantë, pasi bashkë me të zgjidhet edhe çështja e kufirit ndërmjet dy vendeve.