Lutja e Atit të Shenjtë drejtuar Virgjërës Mari për takimin e të rinjve në Loreto
në shtator 2007.
(14.02.2007 RV)Në përfundim të
takimit me ipeshkvijtë dhe besimtarët e dioqezave markigjane, Papa kryesoi lutjen
e përgatitur prej Tij, drejtuar Virgjërës Mari, në prag të takimit me të rinjtë në
Loreto. Benedikti XVI, pra, e ka shkruar personalisht lutjen drejtuar Zojës së
Bekuar për “Agorën” – apo Logun e Kuvendit me rininë, që organizohet çdo tri vjet
nga Konferenca ipeshkvnore italiane, për t’i bërë të rinjtë gjithnjë më shumë protagonistë
të misionit të tyre, takim që sivjet do të arrijë kulmin në Loreto. Papa iu lut Virgjërës
Mari të na ndihmojë të ecim pas Krishtit në rrugën e fesë: “Mari, ti që në Nazaret
jetove pranë Krishtit, na i mbush zemrat me dashurinë tënde, me nënshtrimin
tënd, me heshtjen që Fjalën dëgjon, e e bën lirisht të lulëzojë! Papa lutet
që freskia e fesë të ndrisë në sytë tonë e t’ia ngrohë zemrën çdo njeriu që takojmë: “Mari,
ti Virgjër që Zotin madhërove, ndihmona gëzimin ta çojmë nëpër botë. E ashtu
si në dasmën e Kanës, frymëzoi të rinjtë të shërbejnë, e të bëjnë veç ashtu
si u thotë Krishti. Benedikti XVI i kërkoi Virgjërës Mari të lutet që Krishti,
i vdekur e i ngjallur, të rilindë në zemrat tona e të na shndërrojë në një natë përplot
me dritë, përplot me Të. Mari, Zojë e Loretos, ndihmona që sytë drejt qiellit
të lartojmë. Dëshirojmë Jezusin ta shohim, të flasim me të dëshirojmë. Anekënd
ne lajmin të përhapim, se Krishti të gjithëve na do!