Konferenca Ipeshkvnore e Shqipërisë i fton besimtarët dhe gjithë shtetasit të votojnë
me vetëdije për të mirën e përbashkët të shoqërisë.
(11.02.2007 RV)Në përgatitje të zgjedhjeve vendore të 18 shkurtit të ardhshëm,
ipeshkvijtë e Kishës katolike në Shqipëri, me shqetësim të natyrshëm baritor e plot
vëmendje ndaj situatës shoqërore-politike, sqarojnë besimtarët katolikë për qëndrimin
e Kishës në prag të kësaj ngjarjeje. Ipeshkvijtë i ftojnë besimtarët të japin ndihmesën
e tyre për të mirën e përbashkët, duke marrë pjesë në votime e duke pasur mirë parasysh
se Kisha katolike, që ka për mision kumtimin e Ungjillit të Krishtit, nuk identifikohet
me asnjërën nga partitë. Ipeshkvijtë i ftojnë besimtarët që të votojnë me ndjenja
të larta qytetare, larg çdo urrejtjeje, hakmarrjeje e fanatizmi, me besimin se vota
e tyre është nxitje për të hedhur një hap përpara në procesin e zhvillimit të Shqipërisë.