Ipeshkvijtë çekë u përgjigjen akuzave për prifërinjtë kolaboracionistë
(04.02.2007 RV)Në Republikën Çeke
është ndezur debati për priftërinjtë që kanë bashkëpunuar me regjimin komunist. Sipas
historianëve, gjatë viteve të persekutimit kundër Kishës në Çekosllovaki, në çdo dhjetë
meshtarë, një ka pasur marrëdhënie me policinë sekrete komuniste. Ndërmjet bashkëpunëtorëve
me regjimin komunist këto ditë është kujtuar edhe emri i kryetarit të Konferencës
ipeshkvnore, imzot Jan Graubner, kryeipeshkëv i Olomukut.Ipeshkvijtë janë përgjigjur
me një notë, në të cilën shpjegojnë se Kisha, mbi të gjitha, ka qenë e persekutuar,
ka qenë viktimë. Në se është e vërtetë që disa nga përfaqësuesit e saj bashkëpunuan
nga frika, nuk duhet harruar se shumica e pagoi me jetë besnikërinë ndaj Krishtit.
Është për t’u çuditur – shënohet në notë – që mjetet e komunikimit sulmojnë njerëz,
të cilët në fund të fundit kanë qenë viktima, ndërsa tolerojnë pa fjalë, praninë e
komunistëve të djeshëm ose të trashëgimtarëve të tyre në parlament. Ipeshkvijtë çekë
njoftojnë edhe se Kisha po merret me dosjet e meshtarëve bashkëpunëtorë, duke i detyruar
personalitetet e rëndësishme të japin dorëheqjen. Në vitin 1990, një vit pas shembjes
së regjimit, Episkopati çekosllovak pati organizuar një shtegtim pastrimi në Shenjtëroren
e Velehradit për të gjithë ata që e ndjenin veten të njollosur me fajin e bashkëpunimit.
Njerëz të tillë janë këshilluar vazhdimisht ta pranojnë publikisht fajin dhe të kërkojnë
falje. – E cila kategori e popullsisë e ka bërë një gjë të tillë kaq shpejt - në një
vend ku pak njerëz patën guximin të mos e pranojnë bashkëpunimin me sigurimin, pa
marrë parasysh se kjo mund t’i kushtonte tepër shtrenjt, më shtenjt se vetë jeta?
– pyesin ipeshkvijtë dhe në përfundim i ftojnë mjetet e komunikimit të tregojnë më
shumë kujdes kur japin informacione për dosjet e të sigurohen mirë që këto informacione
të jenë të vërteta.