5-vjetori i vizitës ‘Ad Limina Apostolorum’ i Konferencës Ipeshkvnore katolike të
Shqipërisë.
(04.02.2007 RV)Pesë vjet më parë
e pikërisht më 4 shkurt 2001, në Vatikan përfundoi Vizita “ad Limina Apostolorum”
e Konferencës Ipeshkvnore katolike të Shqipërisë tek Papa Gjon Pali II. Kujtojmë se
Vizitat ‘ad Limina’ apo tek Varret e Apostujve, gjatë të cilave ipeshkvijtë e mbarë
botës takohen me Papën, kryhen çdo pesë vjet. Kanë kaluar pra pikërisht pesë vjet
dhe Konferenca Ipeshkvnore e Shqipërisë gjatë vitit 2007 do të bëjë vizitën e dytë,
që do të shënojë vazhdimësinë e një tradite të krijuar e të mbrojtur me gjak martirësh.
E pikërisht këtë kujtoi Gjon Pali II pesë vjet më parë, gjatë Meshës përfundimtare
të kremtuar në Vatikan. Papa falënderoi Kishën shqiptare për besnikërinë ndaj Krishtit
në kohë të vështira dhe i porositi prelatët të vënë në qëndër të çdo veprimtarie Krishtin,
që u dha forcë martirëve shqiptarë t’i bëjnë ballë torturave më mizore, ushqeu shpresën
e të krishterëve në kohë që dukeshin pa kurrfarë shprese, u dha forcë të ringjallen
pas përvojës së rëndë të komunizmit ateist e që, prandej, nuk mund të mos i ndihmojë
sërisht për të realizuar planet e së sotmes e të së ardhmes. Pastaj kryetari i
Konferencës ipeshkvnore të Shqipërisë, Kryeipeshkvi metropolit i Shkodrës, Imzot
Massafra, i dhuroi Atit të Shenjtë një Kryq argjëndi, punuar me filigranë, dhe projektet
për ndërtimin e kuvendit të murgeshave klarise “Shtëpia e paqes”.Pas pesë vjetësh
“Shtëpia e Paqes” është realizuar në një vende tejèt simbolik, në zemër të Shkodrës,
në shtëpinë ku dikur ishte noviciati françeskan, më pas dega e punëve të brëndshme
ku u torturuan mizorisht kundërshtarët e regjimit, ndërmjet të cilëve pothuajse të
gjithë klerikët shqiptarë. Tani kjo shtëpi është përsëri vend urate. Por pranë e pranë
Kapelës, është ruajtur edhe një mjedis burgu, muze që të kujton porosinë e Papës
për të mos e harruar të kaluarën e për të kujtuar sidomos sa e madhe është ndihma
e Krishtit, i cili i mbështetë dishepujt e vet ta shpallin fjalën e tij edhe në rrethana
të vështira e nganjëherë armiqësore.