Festa e shiitëve në Irak u la me gjak: 40 të vdekur, e lajme të tjera.
(30.01.07 RV) Presidenti amerikan George Bush ka shprehur keqardhje për dhunën
e fundit në Liban duke paralajmëruar Iranin, Sirinë dhe Lëvizjen Hezbollah se do të
japin llogari për destabilizimin e situatës.
Festa e Ashureve e myslimanëve
shiit në Irak u la me gjak. Së paku 40 shtegtarë janë vrarë pas atentateve e sulmeve
në të gjithë vendin. Edhe mbi Irakun foli presidenti amerikan Bush. Kreu i Shtëpisë
së Bardhë deklaroi se SHBA-të do t’i përgjigjen me vendosmëri çdo përpjekjeje të Iranit
për të nxitur dhunën në Irak. Nga ana tjetër, Bush sqaroi se Uashingtoni nuk ka ndërmend
të sulmojë Iranin. Ndërkaq, merren vesh shifrat zyrtare të betejës së Nazhafit,
të shtunën e kaluar, ku u përfshinë forcat irakiane dhe ato amerikane. Sipas Ministrisë
së Mbrojtjes janë vrarë 263 vetë dhe janë arrestuar 500 të tjerë, ndër të cilët 210
të plagosur.
Grupet rivale palestineze Hamas dhe Fatah deklaruan se
është arritur marrëveshja për armëpushim. Marrëveshja u arrit pas 5 ditë luftimesh,
gjatë të cilave janë vrarë së paku 30 palestinezë. Ndërkaq, aviacioni izraelit ka
bombarduar gjatë natës së kaluar Rripin e Gazës, për të shkatërruar një tunel të ndërtuar
nga ekstremistë palestinezë për të kryer sulme në Izrael.