(29.01.2007 RV)Reflektim i Atë
Raniero Kantalamesës mbi Enciklikën e parë të Benediktit XVI. Një sukses editorial
në shumë aspekte: një vit pas botimit, Enciklika e Benediktit XVI ka thyer shumë rekorde.
Vetëm në Itali janë shitur më se 1 milion e 450 mijë kopje. Në Gjermani e në Spanjë
është rishtypur tri herë; në Poloni dy herë e është përkthyer edhe në gjuhën ruse
e kineze, ndërsa në gjuhën latine do të ribotohet së shpejti sepse është zhdukur nga
libraritë. Enciklika është përkthyer edhe në gjuhën që përdoret nga të verbërit. Por,
përtej numrave, ka rëndësi se Deus Caritas Est tërhoqi vëmendjen e botës laike mbi
krishterimin, mbi vlerat e krishtera, siç nënvizon predikatari i Shtëpisë Papnore,
atë Raniero Kantalamesa, në mikrofonin e Radios sonë: - Nga frytet që
përftoi, mund të gjykojmë se Papa diti të zgjedhë si duhet, sepse sigurisht që
Deus Caritas Est ishte në qëndër të vëmendjes së shumë reflektimeve dhe frymëzoi shumë
diskutime, edhe në botën laike. E kjo nuk mund të mos na çuditë, sepse zakonisht me
enciklikat merren vetëm besimtarët. Këtë herë u vërejt një interesim i rrallë nga
ana e botë shekullare. Besoj se me këtë enciklikë Papa përuroi ose gjeti një mënyrë
të re për të bërë apologjinë e krishtërimit, të vlerave të krishtera, të vlerave të
fesë, të cilat jo vetëm që nuk i kundërvihen arsyes, por janë lulja më e çmuar e arsyes.
Kjo, e dimë është temë e dashur për Benediktin XVI, që pasqyrohet tërthorazi edhe
në këtë Enciklikë.