Propozimi i Ahtisarit nuk përmban asnjë referim për sovranitetin e Serbisë mbi Kosovën
(25.01.07 RV) Nesër, i dërguari i veçantë i OKB-së, Marti Ahtisari do të paraqesë
propozimin e tij për statusin e Kosovës para vendeve të Grupit të Kontaktit dhe Rusisë
në Vienë. Takimi bëhet me dyer të mbyllura e akoma nuk dihet asgjë për përmbajtjen
e propozimit, por disa burime të paidentifikuara nga Kombet e Bashkuara kanë dhënë
disa deklarata për agjensinë britanike të lajmeve Rojters. Sipas këtyre burimeve,
projekti i jep Kosovës të drejtën të marrë pjesë në marrëveshjet ndërkombëtare dhe
të aplikojë për anëtarësim në organizatat dhe institucionet ndërkombëtare, duke përfshirë
edhe vetë Kombet e Bashkuara, Fondin Monetar Ndërkombëtar dhe Bankën Botërore. Plani
flet për dy-nënshtetësinë dhe i kërkon Prishtinës të krijojë marrëdhënie të mira me
Serbinë dhe me shtetet e tjera fqinje. Në ndryshim nga rezoluta 1244 e OKB-së, që
qeverisi Kosovën deri në largimin e forcave serbe, propozimi nuk përmban asnjë
referim për sovranitetin e Serbisë mbi Kosovën. Kosova do të marrë mbi vete,
për sa i takon, të gjitha aspektet ekonomike e borxhet e ish-Jugosllavisë e të Serbisë.
Gjermania e ka përkufizuar këtë status si “pavarësi e kufizuar”. Kufizimet do të administrohen
nga Bashkimi Evropian. Gjithashtu do të caktohet një vëzhgues i jashtëm. Përsa
u përket serbëve të Kosovës, Ahtisari do t’u japë atyre të drejtën të vetëqeverisen,
kontroll të konsiderueshëm mbi policinë e zonave ku banojnë dhe të drejtën të krijojnë
lidhje të drejtpërdrejta me Beogradin. Serbia mund të financojë zonat serbe, me kusht
që paratë të kalojnë përmes Prishtinës. Manastiret e kishat ortodokse serbe më të
lashta do të shpallen zona të mbrojtura. Stomaku i shqiptarëve duhet të tresë edhe
vite të gjata mbikqyrjeje nga ana e një misioni policor evropian, si edhe një të dërguar
në modelin e Bosnjës, që ka pushtet për të vendosur ligje e për të emëruar zyrtarë
lokalë. NATO-ja nuk do ta ndryshojë numrin e trupave së paku deri në vitin 2008. Çelësi
i gjithçkaje duket se është Rusia. Nëse ajo nuk vendos veton, një rezolutë e mundshme
e OKB-së për statusin e Kosovës do të dalë në mesin e vitit 2007, e sipas gjasave,
do t’u lejojë shteteve të botës ta njohin ose jo shtetin e ri e të fundit nga shpërbërja
e ish-Jugosllavisë, sipas politikës së tyre. NATO-ja është e përgatitur për një eksod
të mundshëm të serbëve të Kosovës, për dhunë nga ana e shqiptarëve, ose për një përpjekje
të serbëve veriorë që ta ndajnë Kosovën më dysh.