Амаль усе біскупы і сьвятары ў Кітаю астаюцца ў лучнасьці з Апостальскаю Сталіцаю,
а каталіцкая супольнасьць ў гэтай краіне ў хуткім тэмпе расьце. Ватыкан пацьвердзіў
волю дыялогу з урадам Кітайскае Народнае Рэспублікі, прадказаў таксама, што Папа Бэнэдыкт
16 зьвернецца з спэцыяльным лістом да кітайскіх католікаў. Пасьля сустрэчы на тэму
сітуацыі Каталіцкага Касьцёла ў Кітаю Прэсавае Бюро Апостальскай Сталіцы выдала спэцыяльны
камунікат у якім чытаем, між іншым: Двухдзённая сустрэча адбылася ў Апостальскім
Палацы у днях 19 і 20 студзеня. Папа Бэнэдыкт 16 склікаў яе, каб лепш пазнаёміцца
з сітуацыяю Каталіцкага Касьцёла ў Кітаю. Тэкст камунікату інфармуе, што ў сьвятле
балючае гісторыі Касьцёла ў Кітаю ды галоўных здарэньняў мінулых гадоў абмеркавана
найважнейшыя і найбольш неадкладныя праблемы, якія чакаюць адпаведных разьвязак ў
аднясеньні да асноўных прынцыпаў Боскага ўстанаўленьня Касьцёла ды рэлігійнае свабоды.
З глыбокім прызнаньнем прынята сьведчаньні біскупаў, сьвятароў і вернікаў, якія не
ідучы на кампраміс зьбераглі сваю вернасьць Апостальскай Сталіцы, часта коштам вялікіх
цярпеньняў. З асабліваю радасьцю сьверджана, што сёньня амаль усе біскупы і сьвятары
астаюцца ў адзінстве з Рымскім Папам. У часе сустрэчы была выказана воля працягваньня,
поўнага пашаны, дыялогу з уладамі краіны, каб пераадолець недаразуменьні з мінуўшчыны.
Выказана таксама надзею на нармалізацыю адносінаў на розных ступенях. Гэта зрабіла
б магчымым для Каталіцкага Касьцёла мірнае і прадавітае жыцьцё веры ды супольныя дзеяньні
для дабра кітайскага народу ды міру ў сьвеце.