Problemet kishtare më urgjente të Kishës në Kinë - në qendër të takimit, thirrur nga
Papa në Vatikan.
(20.01.2007 RV)Problemet kishtare më të rënda e më urgjente, që kanë të bëjnë
me Kishën në Kinë, e para së gjithash problemi i lirisë fetare, ishin sot në qendër
të vëmendjes në takimin e thirrur nga Papa mbi këtë argument. Takimi, që përfundoi
sot në Vatikan – sipas njoftimit të një komunikate të Sallës së Shtypit të Selisë
së Shenjtë - u kryesua nga Sekretari i Shtetit të Shenjtërisë së Tij, kardinali Tarçizio
Bertone Ky takim – vijon të shpjegojë komunikata - u thirr nga Papa Benedikti
XVI për ta njohur më thellë situatën e Kishës katolike në Kinën Kontinentale. Në
përfundim të paradites, Ati i Shenjtë i përshëndeti pjesëmarrësit në takim, ndërmjet
të cilëve përfaqësuesit e episkoptatit kinez (Hong Kong, Makao, Taivan) dhe të atyre
që, sipas Selisë së Shenjtë, e ndjekin nga afër çështjen. Diskutimi, që - sipas pohimit
të Sallës së Shtypit – preku problemet më të mprehta aktuale, u gjallërua nga sinqeriteti
dhe përzemërsia vëllazërore. Gjatë punimeve, në dritën e historisë së trazuar
të Kishës në Kinë e të ngjarjeve më të freskëta të viteve të fundit, u shqyrtuan problemet
kishtare më të vështira e më urgjente, që presin zgjidhje në përkim me parimet themelore
hyjnore të Kishës e të lirisë fetare. Pjesëmarrësit në takim u njohën, plot mirënjohje,
me dëshmitë e ndritshme që kanë dhënë ipeshkvijtë meshtarët e besimtarët, të cilët
pa pranuar kompromise, mbetën gjithnjë besnikë ndaj Selisë së Shën Pjetrit, duke e
paguar shpesh herë këtë qëndrim me vuajtje të rënda. Me gëzim të veçantë u vërejt
se sot pothuajse të gjithë ipeshkvijtë e meshtarët janë të bashkuar me Papën. Ajo
që të habit – nënvizon komunikata e Sallës vatikanase të Shtypit – është rritja numerike
e bashkësisë kishtare që, edhe në Kinë, është e thirrur të jetë dëshmitare e Krishtit,
të shikojë përpara dhe të përballojë, në kumtimin e Ungjillit, sfidat e reja para
të cilave ndodhet sot shoqëria. Ndërmjet diskutimeve të shumta, gjatë takimit u
vu theksi mbi dëshirën për të vijuar ecjen në rrugën e dialogut ndërtimtar, plot respekt,
me autoritetet qeveritare, për të kapërcyer së bashku keqkuptimet e së kaluarës. Pjesëmarrësit
uruan që të normalizohen sa më shpejt marrëdhëniet në nivele të ndryshme, me qëllim
që të krijohen kushtet për ta jetuar në mënyrë paqësore e të frytytshme jetën në Kishë
si dhe për të punuar së bashku për të mirën e popullit kinez dhe për paqen në botë. Papa,
që u njoftua gjërësisht për propozimet e dala nga takimi – përfundon komunikata –
ka vendosur t’u drejtojë një letër katolikëve në Kinë.