Solidariteti i Kishave të dy kontinenteve në Kongresin e parë panafrikan.
(18.01.2007 RV)Të këqijat e Afrikës dhe përgjigja e Evropës përmes solidaritetit
të Kishave të dy kontinenteve – është një nga aspektet e trajtuara në Kongresin e
parë panafrikan, që vijon në Tanzani. Vijonë punimet e Kongresit panafrikan mbi
ungjillëzimin, që filloi tri ditë më parë në Dar-es-salaam në Tanzani. Dje Benedikti
XVI u drejtoi pjesëmarrësve një mesazh, përmes të cilit i porosit të jenë nismëtarë
të zellshëm të shpirtit misionar ndërmjet njerëzve dhe të punojnë për edukimin njerëzor
e shpirtëror të popullsive të kontinentit. Por Afrika është edhe toka e problemeve
të rënda, të mëdha e urgjente, siç theksoi kryeministri i Tanzanisë në përshëndetjen
drejtuar kongresistëve. Prej këndej, edhe urgjenca e bashkëpunimit ndërmjet Kishave.
E mbi lidhjet ndërmjet Kishave të Kontinetit të vjetër dhe atyre afrikane, pyetëm
imzot Aldo Giordanon, sekretar i Këshillit të Konferencave ipeshkvnore të Evropës: Përgjigje:
- Po ribëj përvojën e rëndësishme që jetuam në nëntor të vitit 2004, kur për herë
të parë në histori realizuam një simpozium të rëndësishëm, në të cilin morën pjesë
50 ipeshkvij afrikanë e 50 evropianë. Në këtë seli, ipeshkvijtë e të dy kontinenteve
u takuan për të biseduar jo vetëm për Afrikën, por edhe për Evropën, sepse edhe ajo
ka problemet e veta, por edhe përvojën që dëshiron t’ia transmetojëvëllezërve
të Afrikës. Pyetje: - Dje u fol për një nga plagët më të rënda të
Afrikës, për Sidën. Ç’ ndihmë mund t’u japin Kishat evropiane atyre afrikane për lehtësimin
e kësaj plage? Përgjigje: - Ne si Kishë kemi një përvojë të gjatë në fushën
mjekësore, kemi edhe mjete që mund t’i ndajmë së bashku. Nga ana tjetër, edhe lidhur
me këtë temë ne përpiqemi të mësojmë e të përvetësojmë elementet që mund të na ofrojë
Afrika. Për shembull, Afrika di ta vlerësojë lart familjen dhe jetën, vlerësim që
në Evropë nuk gjindet më. Prandaj, duke shfrytëzuar vlerat që janë në Afrikë së bashku
me mjetet e Evropës, besoj se mund ta përmirësojmë gjendjen.