Kreu i UNMIK-ut në Romë takohet me Ministrin e Jashtëm italian.
(17.01.07 RV) Kreu i UNMIK-ut në Kosovë, Joakim Ryker është takuar sot në Romë
me zv.kryeministrin e ministrin e jashtëm italian, Masimo D’Alema. Gjendja e Kosovës,
në prag të zgjedhjeve në Serbi dhe para shpalljes së propozimeve për statusin, ka
qenë në qendër të bisedimeve mes tyre. Janë shqyrtuar gjithashtu edhe niveli i sigurisë
në vend dhe përparimet që janë bërë në sektorët e përgjegjësisë së UNMIK-ut në Kosovë.
Italia ripohon impenjimin e saj në vend. Ambasadori i Shteteve të Bashkuara
në Beograd, Majkël Polt ka deklaruar se Kosova është guri i provës së Serbisë
në rrugën drejt Bashkimi Evropian. Por nëse Prishtina nuk merret vesh me Beogradin,
as Kosova s’mund të pretendojë për integrim në strukturat e Brukselit. Sipas gazetës
franceze “Lë Mond”, kryenegociatori Marti Ahtisari do ta paraqesë propozimin e tij
për statusin më 26 janar. Gazeta citon Komisarin evropian për zgjerimin, Oli Ren,
i cili ka theksuar se nënshkrimi i Marrëveshjes për stabilizim-asociim me Serbinë
varet nga qëndrimi që Beogradi do të mbajë ndaj Kosovës. Bashkimi Evropian do të mundohet
të zgjidhë çdo problem të mundshëm me Rusinë, përkrahësen historike të serbëve.