(16.01.07 RV) Bomba në qendër të Bagdadit. Në atentate të ndryshme kanë vdekur
rreth 20 vetë. Ndërkaq, zyra e Kombeve të Bashkuara njofton se gjatë vitit 2006 janë
vrarë mëse 34 mijë civilë. Nga ana tjetër, Komandanti i trupave amerikane në Irak,
Xhorxh Kesi ka njoftuar arritjen e ushtarëve të parë të Shteteve të Bashkuara, si
pjesë e planit të ri të presidentit Bush për shtimin e sigurisë. Edhe sekretarja e
shtetit Kondolica Rajs, në Arabinë Saudite, u ka kërkuar sot autoriteteve të Riadit
të ndihmojnë për arritjen e paqes në vend, por ato mendojnë se kjo do të varet nga
Iraku. Njëkohësisht, ata kanë frikë se plani i ri amerikan do ta tërheqë Uashingtonin
nga Iraku, para se të jetë krijuar një lloj stabiliteti.
Qeveria izraelite
përgënjeshtroi sot paradite lajmin se ekzistojnë bisedime të fshehta me Sirinë për
një marreveshje paqeje. Sipas së përditshmes “Haaretz”, janë zhvilluar një sërë takimesh
në Evropë, në periudhën shtator 2004 – korrik 2006. Në marrëveshje duhet të përfshihet
edhe kthimi i Lartësive të Golanit, pushtuar nga Siria. Qeveria ka deklaruar se nuk
është në dijeni të takimeve. Ndërkaq, ekziston një marrëveshje ndërmjet Sirisë dhe
Irakut për dorëzimin e ish-zyrtarëve të regjimit irakian, që kanë gjetur strehim në
Siri.