Mbrojtje për emigrantët: këtë kërkoi gjatë lutjes së Engjëllit të Tënzot Benedikti
XVI në Ditën botërore të emigrantit e të refugjatit
(15.01.07 RV)Benedikti XVI theksoi
se realiteti i mërgimit nuk duhet shikuar si problem, por si burim pasurie e se shoqëria
që i strehon emigrantët, duhet t’ua njohë vlerat. Realiteti i emigracionit nuk
duhet parë kurrë vetëm si problem, por edhe, e mbi të gjitha si burim i madh për zhvillimin
e njerëzimit. Këtë theksoi Papa, duke kujtuar të dhënat e fundit statistikore të Kombeve
të Bashkuara, sipas të cilave në botën e sotme numrohen 200 milionë emigrantë; rreth
9 milion refugjatë e 2 milion studentë ndërkombëtarë. Duhen llogaritur, pastaj, edhe
të shpërngulurit brënda vendit dhe emigrantët e parregullt. E të gjithë e kanë një
familje – kujtoi Papa - duke theksuar në vijim se fenomeni është shumë i përhapur
dhe i larmishëm. Në çdo rast, Benedikti XVI kërkon respektimin e dinjitetit njerëzor
të të gjithë mërgimtarëve, të cilët i porosit të mos harrojnë se e kanë për detyrë
të respektojnë vlerat e shoqërisë që i mikpret. Vetëm duke ecur në një rrugë të tillë
– nënvizon Papa, mund të realizohet integrimi i familjeve në sistemet shoqërore, ekonomike
e politike të vendeve drejt të cilave dynden emigrantët: “Uroj – tha Ati
i Shenjtë - të realizohet së shpejti administrimi i ekuilibruar i flukseve të emigrantëve
dhe i lëvizjes njerëzore në përgjithësi, në mënyrë që të përfitojë mbarë familja njerëzore,
duke nisur nga masat konkrete që favorizojnë emigracionin e rregullt dhe bashkimet
familjare, e veçanërisht, nga gratë dhe të miturit”. Pikërisht familja mërgimtare
– nënvizoi Ati i Shenjtë – është burim i posaçëm i të mirave materiale e shpirtërore,
kur respektohet si e tillë. Ajo nuk duhet të pësojë shpërbërje të pandreqshme, por
duhet të mbetet e bashkuar ose të ribashkohet e ta kryej kështu, si duhet, misionin
e vet si djep i jetës e si prehër i parë i edukimit të njeriut. Më pas Papa kujtoi
edhe vështirësitë që duhet të kapërcejë familja mërgimtare: “Shqetësimet, poshtërimet,
varfërinë, brishtësinë” Benedikti XVI kujtoi edhe Mesazhin e tij të posaçëm
drejtuar familjes mërgimtare e më pas ftoi që të gjithë të shikojnë në dramën e Familjes
Shenjte të Nazaretit, kushtet e dhimbshme të jetës të refugjatëve, mërgimtarëve, të
të shpërngulurve, të të persekutuarve. Mund të shikojmë Familjen e Nazaretit,
ikonë e të gjitha familjeve – tha Papa – sepse ajo pasqyron figurën e Hyjit, që ruhet
në zemrën e çdo familjeje njerëzore, edhe atëherë kur ligështohet e edhe shpërfytyrohet
nga provat e rënda të jetës. Shën Mateu Ungjilltar na tregon - kujtoi Papa – se pak
kohë pas lindjes së Jezusit, Shën Jozefi u detyrua të nisej për në Egjipt, duke marrë
me vete foshnjën e nënën e tij, për të ikur nga persekutimi i mbretit Herod. Kështu
Familja e Nazaretit u bë simbol e mbështetje shpirtërore për familjen mërgimtare. Ndërmjet
shumë përshëndetjeve në gjuhë të ndryshme, Papa kujtoi, në anglisht e polonisht, Ungjillin
e së dielës, kushtuar Dasmës së Kanës. Në Meshën shenjte – tha Benedikti XVI duke
folur në gjuhën polake – kujtojmë mrekullinë e Krishtit në Kanë të Galilesë dhe porosinë
e Nënës së Zotit: “Bëni gjithçka t’ ju thotë!”. Fjalët e saj janë burim guximi
për familjet e emigrantëve, të refugjatëve e dhe për ne të gjithë, sidomos në çaste
veçanërisht të vështira të jetës, kur kërkojmë të vërtetën dhe ndihmën e Zotit – theksoi
Ati i Shenjtë, duke pasur parasysh ngjarjet e fundit në Kishën e në shoqërinë polake.Në
italisht - një përshëndetje e veçantë drejtuar grupit të të rinjve emigrantë, ardhur
në Sheshin e Shën Pjetrit nga vende të ndryshme të botës, shoqëruar nga ipeshkvi i
Kazertës, imzot Rafaele Nogaro.