(14.01.2007 RV)Sot Kisha katolike
kremtoi të Dielën e dytë të Kohës gjatë vitit kishtar U përkujtua edhe festa e
Shën Feliçit të Nolës dhe Shën Malakisë profet. Nesër, e hënë, është festa e
Shën Palit vetmitar, e Shën Gjonit Kalibit, murg dhe e Shën Maurit abat. Liturgjia
e ditës na kujton se kemi një Meshtar të madh pranë Atit: Krishtin Zot. Shën Marçeli,
papë e martir dhe Shën Prishila, matronë romake, që do të kremtohen të martën,
na nxisin të reflektojmë mbi ligjin fetar, duke na bindur se ai është në shërbim të
njeriut. Liturgjia e festës së Shën Andout abat, që do të kremtohet të mërkurën,
na kujton se Krishti, pasi shëron një njeri, i fton të pranishmit të kuptojnë se duke
vepruar kështu, është besnik i ligjit të së shtunës. Të enjten e ardhshme
përkujtohet festa e Shën Priskës, themeluese e kishës romake me të njëjtin emër në
Aventin. E enjtja është edhe dita për thellimin e dialogut fetar hebraiko-kristian,
ndërsa fillon Java e lutjes për bashkimin e të krishterëve, që do të vijojë deri më
25 janarin e ardhshëm. Të ndjekim meditimet që shoqërojnë lutjen e Kishës gjatë kësaj
jave: Ditën e parë meditohet mbi fjalët e Besëlidhjes së vjetër e të Re,
që na kujtojnë se në heshtjen e asgjësë Zoti e krijoi botën me fjalën e tij. Në fillim
të fillimit, kur s’ishte tjetër, veç kaosi e pështjellimi, fjala e Zotit e ndërpreu
heshtjen për t’i caktuar çdo frymori vendi Të premten e ardhshme do të kremtohen
Shën Gjermaniku, martir i Filadelfies, Shën Gjoni ipeshkëv i Ravenës, Shenjtorët Mario,
Marta, Audifaci e Abaku martirë . Është Dita e dytë e Javës së lutjes për bashkimin
e të krishterëve, që ka në qëndër të meditimit Fjalën shëlbuese të Krishtit, fuqinë
e kësaj fjale, që i bën deri të shurdhërit ta dëgjojnë e t’ua kumtojnë të tjerëve.
Të shtunën, Dita e tretë e Javës së lutjes për bashkimin e të
krishterëve do të kremtohen Shën Fabiani, papë e martir dhe shën Sebastiani, martir.
Nxitemi të meditojmë mbi heshtjen e të harruarve dhe vajin e të vuajturve, duke pasur
mirë parasysh se ne jemi një trup i vetëm në Krishtin e mëshirshëm. Mjerimi i disa
pjesëve të trupit, nuk është thjeshtë problem i tyre, por problem i të gjithëve.