Në takimin e episkopatit polak vendoset të sqarohet e kaluara. Koment i kardinalit
Bertone.
(14.01.2007 RV)Ipeshkvijtë polakë kërkojnë të shqyrtohet veprimtaria e tyre
gjatë regjimit komunist. Sekretari i Shtetit të Vatikanit, kardinali Bertone, shpreh
kënaqësinë e tij dhe fton që verifikimi të shtrihet edhe mbi anëtarët e partive dhe
të administratës publike, por duke mos harruar t’i paralajmërojë të gjithë se duhet
të ruhen nga falsifikimi i dokumentave me qëllime destabilizuese. Të gjithë ipeshkvijtë
polakë do t’i nënshtrohen verifikimit të së kaluarës së tyre gjatë regjimit komunist.
Ky është vendimi që u muar gjatë takimit të jashtzakonshëm të episkopatait polak,
mbledhur pardje në Varshavë. Është një përpjekje reale për transparencë, pas dorëheqjes
së kryeipeshkvit të Varshavës, Stanislau Vielgush, i cili pranoi se në rini kishte
bashkëpunuar me sigurimin polak. Gjatë takimit të ipeshkvijve u nënvizua se arkivet
vigane të ish-regjimit, një pjesë e mirë e të cilave tashmë e manipuluar, deri tani
po përdoren vetëm për sulme kundër personaliteteve kishtare. E mbi ngjarjet që
po jeton këto ditë Kisha polake, të premten pasdite foli edhe Sekretari i Shetit të
Vatikanit, kardinali Tarçizio Bertone, gjatë vizitës në Kryesinë e Veprimit Katolik
Italian. Duke iu përgjigjur pyetjeve të gazetarëve, që i kërkuan mendimin e tij për
vendimin e ipeshkvijve polakë, cardinali Bertone u përgjigj se duhet shoshitur mirë
e kaluara, për t’ia dorëzuar, pastaj, të gjitha komunikimet, Atit të Shenjtë.