Sonte presidenti Bush do të shpallë strategjinë e re për Irakun.
(10.01.2007 RV)Me një fjalim televiziv
nga Shtëpia e Bardhë, sonte në orën 2 të natës me orën evropiane, presidenti amerikan
Xhorxh Bush do t’i shpallë botës strategjinë e re për Irakun. Pritet që ai të dërgojë
edhe 20 mijë ushtarë të tjerë në vend, në faza të ndryshme. Gjithashtu, brenda nëntorit
2007, të gjitha provincat irakiane duhet të kalojnë nën kontrollin e ushtrisë së Bagdadit. Sipas
gazetës amerikanase “Uashington Post”, për herë të parë, Bush përgatitet t’u japë
krerëve ushtarakë, një urdhër për të cilin ata fillimisht nuk kanë qenë dakord. Janë
bindur më vonë, duke marrë premtime për një impenjim më të madh ekonomik e politik
në Irak. Megjithëse sipas Kushtetutës, presidenti amerikan Bush ka të drejtë
të vendosë vetë për një gjë të tillë, Senati dhe Dhoma e Deputetëve përgatiten të
votojnë për strategjinë e re. Ky votim do të jetë simbolik, por do të nxjerrë në shesh
edhe të gjithë republikanët që nuk janë dakord me presidentin. Demokratët në parlament
shpresojnë kështu të arrijnë në një zgjidhje bi-partizan për Irakun, gjë që sipas
tyre, mund të ndryshojë realisht situatën në vend.