Të krishterët të bëhen veprimtarë të paqes: kështu atë Kantalamesa në predikimin e
dytë të kohës së Ardhjes para pjesëtarëve të Kuries Romake.
(22.12.06 RV) Të bëhen veprimtarë
të paqes ndërmjet feve dhe ndërmjet besimtarëve e jo besimtarëve: kjo është linja
e parë e frontit dhe urgjenca para të krishterëve të ditëve tona. Me këtë reflektim,
predikatari i Shtëpisë Papnore, at Raniero Kantalamesa, komentoi mesazhin e Papës
Benedikti XVI për Ditën Botërore të Paqes 2007, i cili frymëzoi predikimin e dytë
të Kohës së Ardhjes. Por çdo të thotë të jesh veprimtar i paqes? Shpjegon at Kantalamesa: Veprimtar
i paqes nuk është sinonim me fjalën “paqësor”, pra me një person të qetë, që eviton
kontrastet sa më shumë që të jetë e mundur; nuk është sinonim as me fjalën “pacifist”,
nëse si të tillë quhen ata që janë kundër luftës, pa bërë asgjë për të pajtuar palët
kundërshtare. Termi më i drejtë do të ishte “paqtor”. E nëse Zoti është veprimtari
suprem i paqes, ata që punojnë për paqen janë “imitues” të Zotit. Për një të krishterë
shkohet edhe më tej: paqja është dhuratë që vjen nga lart, nga Shpirti Shenjt, është
fryt i dashurisë trinitare: Kuptohet atëherë se çdo të thotë të jesh veprimtar
i paqes – tha at Kantalamesa. Paqja nuk shpiket e as krijohet, por përçohet, lihet
të kalojë paqja e Zotit dhe paqja e Krishtit, që tejkalon çdo inteligjencë. Ne nuk
duhet e as mund të jemi burim, por vetëm kanal i paqes. Këtë e shpreh mirë lutja e
shën Françeskut të Asizit: “O Zot, bëj që unë të jem mjet i paqes tënde”. At
Kantalamesa kritikoi më pas shekullarizimin e festës së Krishtlindjes, duke vënë në
dukje se ajo është rruga pas kometës, që lajmëron lindjen e Krishtit, e jo festa e
renave dhe e arushave me lesh.