Kalendari i riteve të Krishtlindjes kryesuar nga Benedikti XVI. Më 24 dhjetor përurimi
i Shpellës së Betlehemit në Sheshin e Shën Pjetrit.
(19.12.2006 RV) Veprimtaritë kryesore: Mesha e Mesnatës së Këshndellave dhe
Mesazhi drejtuar Romës e Botës, shoqëruar me Bekimin Apostolik, ditën e solemnitetit
të Lindjes së Krishtit. Salla e Shtypit e Selisë së Shenjtë publikoi kalendarin
e veprimtarive liturgjike të Benediktit XVI për kremtimet e Krishtlindjes dhe të Vitit
të Ri 2007: Më 24 dhjetor, natën e solemnitetit të Lindjes së Zotit, Papa
Ratzinger do të kremtojë Meshën solemne të Mesnatës së Këshndellave në Bazilikën e
Shën Pjetrit. Më 25 dhjetor, në solemnitetin e Lindjes së Zotit, në mesditë,
siç është bërë traditë prej disa vjetësh, nga lozha qëndrore e Bazilikës së Shën Pjetrit,
Ati i Shenjtë do t’i drejtojë mbarë njerëzimit mesazhin e Krishtlindjes dhe do të
japë bekimin e Tij apostolik “Urbi et Orbi” – “Romës dhe botës”. Më
31 dhjetor, dita e fundit të Vitit 2006, solemniteti i Zonjës së Bekuar, Nënës
së Zotit, Benedikti XVI do të udhëheqë, në Bazilikën e Shën Pjetrit, Lutjet e para
të mbrëmjes, gjatë të cilave do të këndohet himni tradicional i falënderimit të Zotit
“Te Deum”, në përfundim të vitit civil. Paraditen e 1 janarit 2007,
Papa do të kryesojë Meshën Shenjte në Bazilikën e Shën Pjetrit. Është solemniteti
i Zonjës së Bekuar, Nënës së Zotit dhe Dita e XL Botërore e Paqes 2007 me temë: “Njeriu
është zemra e paqes”. Më 6 janar 2007, në solemnitetin e “Ujit
të Bekuar”, Benedikti XVI do të kryesojë Meshën Shenjte në Bazilikën e Vatikanit.
Më 7 janar 2007, Festa e Pagëzimit të Zotit, Shenjtëria e Tij,
Benedikti XVI do të kryesojë, në Kapelën Sikstine, kremtimim eukaristik, gjatë të
cilit do të pagëzojë disa fëmijë.