Bashkimi i të krishterëve dhe dialogu ndërfetar, detyrë e Kishave Lindore katolike:
këtë theksoi Papa në takimin me patrikun e Aleksandrisë.
(15.12.2006 RV)Sot, duke u takuar në Vatikan me Patrikun e ri kopt të Aleksandrisë
dhe bashkësinë e tij, Benedikti XVI kujtoi detyrën e nxitjes së bashkimit të të krishterëve
dhe të dialogut ndërfetar me myslimanët. ‘Është një çast i madh i bashkimit vëllazëror
dhe i unitetit të Kishës kopto-katolike me Selinë Apostolike”. Me këto fjalë e priti
sot Papa patrikun e Aleksandrisë të Koptëve, Antonios Naguib, që vizitoi Vatikanin,
i shoqëruar nga patriku i nderit, kardinali Stefanos II dhe nga njëqind priftërinj,
rregulltarë, rregulltare e laikë. Kujtojmë se bashkësia patriakale e koptëve katolikë,
është mbartëse e një tradite shumë të pasur shpirtërore, liturgjike e teologjike që
njihet me emrin tradita aleksandrine, thesaret e së cilës janë pasuri e Kishës. Këtë
e kujtoi edhe Ati i Shenjtë, duke theksuar detyrën e posaçme që u besoi Koncili II
i Vatikanit Kishave Lindore katolike: “Të nxisin bashkimin e gjithë të krishterëve
e veçanërisht, të të krishterëve të viseve lindore, në radhë të parë të koptëve katolikë
me koptët ortodoksë, pa harruar të vijojnë edhe dialogun ndërmjet të krishterëve e
myslimanëve, të cilët në Egjipt përbëjnë 90% të popullsisë.