Заява кардынала Бертоне аб адносiнах з Рускай Праваслаўнай Царквой.
Перагаворы памiж Рыма-каталiцкай Царквой i Рускай Праваслаўнай Царквой Маскоўскага
Патрыярхата працягваюцца, заявiў журналiстам дзяржаўны сакратар Ватыкана кардынал
Тарчызiо Бертоне. Каментуючы заяву Патрыярха Алексiя II°, якi заклiкаў Апостальскую
сталiцу зрабiць канкрэтныя крокi на шляху да спынення несяброўскай мiсii католiкаў
у Расii i СНД, кардынал Бертоне адказаў: “Я не бачыў канкрэтнага тэкста, i такiм чынам,
не магу выказаць нiякiх меркаванняў. Аднак я думаю, што адносiны памiж Маскоўскiм
Патрыярхатам i Святым Пасадам дастаткова добрыя, маюць месца перагаворы, часты абмен
вiзiтамi. З iншага боку, мы не займаемся ў Расii празелiтызмам”. Гэтая заява кардынала
была перададзена на хвалях нашага Радыё на розных мовах. Патрыярх Алексiй II°,
выступаючы 5 лiстапада на штогадовым зборы маскоўскага духавенства, зазначыў: “Працягваецца
каталiцкая мiсiя ў Расii i iншых краiнах СНД сярод людзей, якiя былi ахрышчаны ў праваславii,
а таксама вельмi несяброўская палiтыка кiраўнiцтва Украiнскай Грэка-каталiцкай Царквы
ў адносiнах да кананiчнай Украiнскай Праваслаўнай Царквы. Спадзяюся, што Ватыкан зробiць
канкрэтныя крокi дзеля змены сiтуацыi ў лепшы бок”, - зазначыў галава РПЦ МП.