Imzot Mambertì theksoi në OSBE se fetë janë në rrezik, në se bëhen viktima të paragjykimeve.

(6.12.2006 RV)“Të gjitha fetë janë në rrezik, kur njëra prej tyre është viktimë e stereotipeve dhe e paragjykimeve”. Këtë theksoi imzot Dominik Mambertì, Sekretar i Vatikanit për marrëdhëniet me Shtetet, në fjalimin e tij të parë, mbajtur në Këshillin e Ministrave të OSBE-së, Organizatës për Siguri dhe Bashkëpunim në Evropë, që përfundoi dje në Bruksel. Kujtojmë se OSBE-ja është organizëm në të cilin marrin pjesë 56 shtete: të gjitha shtetet evropiane si dhe SHBA, Kanadaja, tetë republikat aziatike ish-sovjetike dhe Turqia.
Imzot Mambertì nënvizoi se në botën se sotme, që ndryshon, janë më të nevojshme se kurrë dialogu e toleranca. Prandaj – vijoi prelati – të gjitha fetë janë në rrezik, përderisa nuk njihet ose relativizohet intoleranca, të cilës detyrohet t’i nënshtrohet njëra prej tyre. Në këtë kuptim – shtoi Imzot Mambertì – nuk mund të harrohet se pikërisht në zonën e OSBE-së u vra një meshtar katolik e se të krishterët kanë qenë vazhdimisht viktima të dhunës e të sulmeve. E si munden fetë ta promovojnë me autoritet e sukses respektin e mirëkuptimin – pyeti prelati – në se ata vetë janë viktima të streotipeve e të paragjykimeve? Duhet, prandaj të shmanget çdo formë e përbuzjes së feve – pohoi Imzot Mambertì i cili, duke cituar një nga fjalimet e Benediktit XVI në Turqi, theksoi se njohja e rolit pozitiv që luajnë fetë në gjirin e shoqërisë mund e duhet t’i japë një shtytje të re shoqërive tona për të thelluar gjithnjë më shumë njohjen e njeriut e për t’ia respektuar gjithnjë më mirë dinjitetin.
Prelati e ftoi OSBE-në t’i japë përgjigje të suksesshme kërcënimit të terrorizmit dhe problemeve të emigracionit e të sigurisë energjitike, ku duhet kërkuar shkaku i padrejtësive ekonomike e shoqërore. Sekretari i Vatikanit për marrëdhëniet me shtetet i nxiti të gjithë pjesëmarrësit në Këshill, ta thellojnë luftën kundër trafikut të njerëzve, duke i mbrojtur viktimat. Vëmendje të veçantë – nënvizoi prelati – i duhet kushtuar plagës së shfrytëzimit seksual të fëmijëve, e cila shpesh herë lidhet ngusht me trafikun e njerëzve. Në përfundim Imzot Mambertì uroi që të forcohet bashkëpunimi ndërmjet vendeve të OSBE-së për të krijuar kështu një zonë paqeje e stabiliteti, duke saktësuar se për të pasur demokraci të suksesshme, është i nevojshëm një bashkëpunim sa më i frytshëm shumpalësh.