Më në fund takimi Bush-Al Maliki në Aman e lajme të tjera.
(30.11.06 RV) Pas tensioneve e polemikave, u zhvillua më në fund sot paradite
takimi i shumëpritur ndërmjet presidentit amerikan Xhorxh Bush dhe kryeministrit irakian
Nuri al-Maliki në Aman të Jordanisë. Bush përsëriti mbështetjen e tij ndaj Al
Malikit, një ditë pas publikimit në gazetën amerikane “Nju Jork Tajms” të një raporti
sekret ku ekzekutivi irakian konsiderohet i dobët për të marrë në dorë fatet e vendit.
Por, dy orë e gjysëm takimi ballë për ballë sqaruan edhe dyshimet më të vogla të irakianëve,
për hir të të cilave, Al-Maliki nuk e takoi mbrëmë presidentin Bush, sipas programit.
Të dy liderët u morën vesh për shpejtimin e formimit të forcave të armatosura dhe
policisë irakiane, në mënyrë që së afërmi të jenë në gjendje të sigurojnë stabilitetin
në vend. “Puna jonë do të kryhet deri në fund” deklaroi Bush.
Uashingtoni
do të tërheqë gradualisht 15 brigata luftimi, që ndodhen aktualisht në Irak, por nuk
është përcaktuar asnjë kalendar për tërheqjen e plotë. Të mërkurën e ardhshme, ky
propozim i komisionit Bejker do t’i paraqitet presidentit amerikan Bush dhe Kongresit.
Me këtë kompromis, trupat e luftimit, të cilat përbëjnë gati gjysmën e 150 mijë ushtarëve
amerikanë në Irak, nuk konsiderohen si të përhershme në terren. Ndërkaq, në Bagdad,
gjatë 24 orëve të fundit janë gjetur 52 trupa pa jetë, të gjitha me shenja torture.
Negociatat për formimin e qeverisë palestineze të bashkimit kombëtar janë
“në një rrugë pa krye” për shkak të pengesave që krijon grupi islamik Hamas. Kështu
deklaroi presidenti palestinez Abu Mazen, në konferencën e përbashkët për shtyp me
sekretaren amerikane të shtetit, Kondolica Rajs në Jeriko. Të dy ranë dakord mbi nevojën
për ta vazhduar armëpushimin, në fuqi që nga e diela e kaluar në Rripin e Gazës. Rajs,
e cila është takuar edhe me autoritetet izraelite në Jeruzalem, theksoi se Izraeli
duhet të kryejë një sërë veprimtarisht humanitare për të përmirësuar kushtet e jetesës
së palestinezëve.