Veprimtari festive me rastin e 28 nëntorit në Romë. “Besa-Fede”.
(23.11.2006 RV) Me rastin e Festës kombëtare të shqiptarëve, Rrethi italo-shqiptar
i kulturës “Besa- Fede” organizon të shtunën, më 25 nëntor 2006, në orën 17.
30, në sallën e konferencave ’Via dei Greci 46, Romë’, paraqitjen e “Fjalorit biobibliografik
të italo - shqiptarëve” nga Pietro de Leo, profesor i historisë pranë Universitetit
të Kalabrisë. Fjalori sapo është botuar nga Shtëpia botuese Brener e Kozencës në
kolanën “Biblioteka e shqiptarëve”. Pastaj, sipas traditës, të dielën, më 26
nëntor, në orën 10. 30 në Kishën e Shën Athanasit (Via del Babuino 149) do të
kremtohet “Liturgjia hyjnore e Shën Gjon Krizostomit në gjuhën shqipe për të gjithë
shqiptarët që jetojnë në Shqipëri, në Kosovë, në Maqedoni, në Mal të Zi e në diasporën
e vjetër e të re. Dy fjalë për Fjalorit biobibliografik të italo-shqiptarëve” Në
kolanën “Biblioteka e Shqiptarëve të Italisë” u publikua një vëllim i çmuar, kushtuar
personaliteteve arbëreshe që janë dalluar në ndonjërën nga disiplinat kulturore: latrare,
historiografike, shkencore, muzikore, folklorike, fetare e ushtarake. Fjalori,
me 308 faqe, është fryt i një pune të heshtur 30 vjeçare, gjatë së cilës u mblodhën
të dhënat përmes shfletimit të librave, revistave, shënimeve bibliografike dhe takimeve
e këshillimeve personale. Autor i kësaj pune, sa të vështirë, aq edhe të nevojshme,
është profesor Gjovani La Viola, studiues tejet i zellshëm e i kujdesshëm i historisë,
autor i shumë botimeve në fushën e fenomeneve e të ngjarjeve më të rëndësishme kalabreze
e italo-shqiptare. Ka lindur në Spexano-Albaneze më 3 shtator 1915 e jeton në Trebisaçe.
Me Fjalorin e tij të çmuar dëshiron të shprehë nderimin për të parët dhe për të gjithë
ata që kanë dhënë ndihmesën e tyre në mbrojtjen e promovimin e Bashkësisë shqiptare
në Itali, që nga Abruco në Siceli. Për çdo personalitet që përfshihet në fjalor,
jepen të dhënat kryesore biografike e shënimet për veprimtarinë; posaçërisht të dhënat
bibliografike si dhe gjykimet e të tjerëve mbi veprën. Pavarësisht nga mangësitë,
që nuk mund të mos i kishte një vepër me shtrirje të tillë, të gjithë shqiptarët duhet
t’i jenë mirënjohës autorit për këtë përmbledhje të dokumentuar të aventurës italo-arëbëreshe.