Me mijëra e mijëra në Bejrut për funeralin e ministrit Gemayel, vra të martën. Në
një mesazh, Papa kërkon “solidaritetin e të gjithë libanezëve”.
(23.11.06 RV) Me dhjetra mijëra libanezë ishin mbledhur sot në Bejrut të Libanit,
për t’i dhënë lamtumirën e fundit ministrit të krishterë Pierr Xhemajel, i cili u
vra në atentat dy ditë më parë. Funerali i tij, i kremtuar në katedralen e shën Gjergjit
nga patriku i Kishës katoliko-maronite libaneze, Nasrallah Sfir, u kthye në një protestë
kundër Sirisë dhe aleatëve të saj hezbollah. Edhe Papa Benedikti XVI dënoi si dje,
ashtu edhe sot vrasjen, duke e quajtur “akt i shëmtuar” në mesazhin, që u lexua gjatë
funeralit. “Ne të gjithë – shkruan Papa – jemi të prekur thellë nga ky akt i shëmtuar
e unë lus Zotin që ta pranojë në mbretërinë e vet atë që u impenjua në jetën e tij
publike në shërbim të vendit e të vëllezërve të vet libanezë”. E më pas, vazhdon:
“unë do të doja që të gjithë libanezët të jenë veçanërisht solidarë në këtë rast e
që sot e tutje të impenjohen për ndërtimin e një Libani autonom e gjithnjë e më vëllazëror,
duke u përpjekur të sigurojnë pjesëmarrjen aktive të të gjitha komponenteve të shoqërisë
e të kombit”. Myslimanët sunitë, druzët dhe liderët e krishterë akuzojnë Sirinë
se ka armatosur dorën e vrasësit të njërit prej pinjojve më në zë të familjeve të
njohura maronite të vendit, pavarësisht se Damasku e ka dënuar vrasjen dhe ka deklaruar
se nuk ka gisht në të. Mbetet fakti që ministri Xhemajel, 34 vjeçar, është i gjashti
ndër figurat anti-siriane që janë vrarë brenda dy vjetësh në Liban. Parrullat që mbanin
në duar pjesëmarrësit e protestës imponente, i kërkonin presidentit aktual pro-sirian
Emil Lahud të japë dorëheqjen e Sirisë të heqë dorë nga Libani: “Agjentë të Basharit,
jashtë nga Baabda (pallati presidencial)”, apo “Shihemi në gjyq” e të tjera. Pikërisht
personaliteteve të tjera të vrara gjatë këtyre dy vjetëve iu referua kardinali maronit
Sfir, kur pohoi se “vala e krimeve vazhdon të destabilizojë Libanin”. Por edhe “libanezët
duhet të qëndrojnë jashtë rivaliteteve” qe ftesa e tij për të ardhmen. Megjithatë,
që sot pasdite, antisirianë sunitë të udhëhequr nga i biri i ish-kryeministrit të
vrarë Hariri u ndeshën me përkrahës shiitë të hezbollahëve jo shumë larg sheshit të
Martirëve në Bejrut, ku u mbajt manifestimi për ministrin Xhemajel. Para se të ndërhynin
mjetet e blinduara të policisë, pati disa të plagosur.