Keqardhja e imzot Tomazit për mosarritjen e marrëveshjes lidhur me ndalimin e minave
kundër njeriut.
(20.11.2006 RV) Keqardhja ishte në qendër të vëmendjes në fjalimin që mbajti
pak ditë më parë Nunci apostolik, imzot Silvano Tomazi, vëzhgues i përhershëm i Selisë
së Shenjtë pranë zyrës së OKB-së të Gjenevës, në Konferencën e tretë kushtuar armëve
tradicionale e, në veçanti, minave kundër njeriut. Dëshira e shumë njerëzve për t’i
ndaluar mjetet e vdekjes, që shkaktojnë tmerre humanitare, posaçërisht mbi popullsitë
civile, nuk u plotësua – pohoi imzot Tomazi – duke nënvizuar se mbetet ende shumë
punë për t’u bërë. Prelati shtoi se vetë shtetet duhet të marrin masa individuale
parandalimi, në pritje të arritjes së marrëveshjes në nivel ndërkombëtar.