Vatikani publikoi programin e shtegtimit apostolik të Benediktit XVI në Turqi, nga
28 nëntori deri më 1 dhjetorin e ardhshëm.
(13.11.2006 RV) Papa do të shkojë në trojet ku nxënësit e Jezusit u quajtën
për herë të parë të krishterë. Do të niset në orën 9-të, të martën, më 28 nëntor,
nga aeroporti romak i Fiumiçinos, për të arritur në orën 13. 00 në aeroportin ndërkombëtar
Esemboga të Ankarasë. Etapa e parë – vizita në muzeun e Ataturkut, Atë i Atdheut,
që shpalli Republikën turke në vitin 1923. Më pas do të zhvillohet ceremonia e mirëseardhjes
dhe vizita tek presidenti i Republikës, Ahmet Nexhdet Sezer; takimi me zevendës-kryeministrin
e me kryetarin për çështjet fetare, Ali Bardokoglu në selinë e këtij të fundit: këtu
Papa do të mbajë një fjalim. Gjithnjë në Ankara, në nunciaturën apostolike, Benedikti
XVI do të takohet me Trupin diplomatik. Të nesërmen Ati i Shenjtë do të niset
nga aeroporti i Ankarasë për të arritur në Smirnë: që këtu do të shkojë në Efez, ku
në orët e vona të paradites do të kremtojë Meshën në shenjtëroren e Meryem Ana Evi,
siç quhet turqisht “Shtëpia e Marisë”. Në Efez, në vitin e largët 431, u mbajt Koncili
i famshëm, që e shpalli Virgjërën Mari ‘Theotokos’ – ‘Nënë e Hyjit’. Pasdite Papa
do të riniset nga aeroporti i Smirnës, për të arritur në Stamboll, ku do të mbahet
vizita e lutjes në Kishën patriarkale të Shën Gjergjit si dhe takimi privat me Patrikun
ekumenik të Kostantinopojës, Bartolomeun I, të cilit Papa do t’i drejtojë përshëndetjen
në selinë e patriarkanës. Paraditen e së enjtes, 30 nëntor, në Stamboll, Papa do
të marrë pjesë në Liturgjinë Hyjnore në Kishën patriarkale të Shën Gjergjit: këtu
do të mbahet ceremonia e nënshkrimit të një Deklarate të përbashkët. Benedikti XVI
do të drekojë me Bartolomeun I pranë patriarkanës. Pasdite do të vizitojë muzeun e
Shën Sofisë; më pas do të shkojë për një vizitë lutjeje në katedralen armene apostolike,
ku do të takohet me Patrikun Mesrob II. Pranë përfaqësisë papnore, Ati i Shenjtë do
të takohet me Metropolitin siro-ortodoks dhe me Rabinin e madh të Turqisë. Në mbrëmje-takimi
dhe darka me anëtarët e Konferencës Ipeshkvnore Katolike të Turqisë. Paraditen
e së premtes, 1 dhjetor, gjithnjë në Stamboll, Papa do të kremtojë Meshën në katedralen
e Shpirtit Shenjt, për të shkuar më pas në aeroport, prej nga do të niset në orën
13. 15 për të arritur në aeroportin romak të Çampinos në orën 14. 45 (duke pasur parasysh
se ora e Turqisë është një orë para në krahasim me atë të Italisë).Kujtojmë se në
Turqi kanë qenë edhe Papa Pali VI, në vitin 1967 dhe Gjon Pali II më 1979. Papa Vojtila
arriti në Ankara më 29 nëntor, 27 vjet më parë dhe i drejtoi bashkësisë së krishterë
fjalët që ia pati drejtuar të krishterëve të këtyre trojeve Shën Pjetri: “Të jeni
gati për t’iu përgjigjur të gjithë atyre që ju kërkojnë arsyet e shpresës suaj. E
këtë ta bëni me ëmbëlsi e respekt, me ndërgjegje të drejtë”.