(09.11.06 RV)Vazhdon jehona e zgjedhjeve të mesit të mandatit në SHBA. Demokratët
fitojnë shumicën edhe në Senat, duke marrë kështu në dorë krejt Kongresin. Tërmeti
politik, që sollën rezultatet e zgjedhjeve, e ka detyruar administratën e presidentit
Bush të bëjë viktimën e saj të parë. Dje dha dorëheqjen sekretari i Mbrojtjes, Donald
Ramsfeld, i cili konsiderohet si një nga përgjegjësit e politikës amerikane ndaj Irakut.
E zëvendëson Robert Gejts, kreu i CIA-s nga viti 1991 deri në vitin 1993. Ai është
një figurë teknike e jo ideologjike dhe është ekspert i punës së padukshme të sigurimit
të shtetit, gjë që i mungon SHBA në Irak. Ndërkaq, mazhoranca e re demokrate në Kongres
i ka kërkuar menjëherë presidentit Bush një mbledhje urgjente për Irakun. Nga të
gjitha kancelaritë ndërkombëtare pritet një ndryshim në politikën e jashtme amerikane,
por edhe ndryshime të tjera. Presidentit republikan Bush do t’i duhet të punojë me
demokratët. Sa është e mundur kjo, na e shpjegon Massimo Teodori, docent i historisë
amerikane në Universitetin e Peruxhas, në Itali: Kjo është një praktikë mjaft e
rregullt në Shtetet e Bashkuara, sepse presidenca dhe Kongresi nuk janë të lidhura
nëpërmjet votëbesimit, por nga një marrëdhënie kontrolli të anasjelltë. Ka ndodhur
shpesh edhe në të kaluarën, që presidentë të një krahu partiak të kenë pasur një Kongres
të krahut tjetër. Në këto raste, sidomos në politikën e jashtme, ka pasur një bashkëpunim
të madh, në veçanti me Senatin. Prandaj, ka mundësi që për të gjetur një rrugëdalje
nga Iraku, presidenti Bush të bashkëpunojë me lidershipin demokratik, sidomos në Senat.