Mbështetje e re e Selisë së Shenjtë në fushatën ndërkombëtare të vaksinimit të fëmijëve
në vende të varfëra
(7.11.2006 RV) Papa blen obligacionin e parë ‘IFFIM’ për fushatën e vaksinimit
që do të shpëtojë 10 milion njerëz në vendet e varfëra. Benedikti XVI, përmes
kardinalit Renato Rafale Martino, kryetar i Këshillit Papnor ‘Drejtësi e paqe’, bleu
sot në Londër njërin nga obligacionet e para të International financing facility for
immunisation, për fushatën e vaksinimeve ndër vendet në rrugë zhvillimi. Është fjala
për një projekt në të cilin aderojnë 8 shtete; Mbretëria e Bashkuar, organizatore
e nismës, Franca, Italia, Spanja, Suedia, Norvegjia, Brazili dhe Jugu i Afrikës. Në
saje të nismës, brënda vitit 2015 duhet të shpëtojnë 10 milion njerëz, ndër të cilët
5 milion fëmijë, në 72 vende të ndryshme të botës. IFFIM është një mekanizëm inovativ
financiar, që jep një ndihmesë të madhe për fuqizimin e sistemeve shëndetësore të
vendeve të varfëra. Obligacionet, të garantuara nga vendet pjesëmarrëse, mund t’i
blejë kushdo.