Papa emëron kardinalin Umes prefekt të Kongregatës për Klerin dhe imzot Angelo Komastrin,
kryeprift të bazilikës së Shën Pjetrit.
(31.10.2006 RV)Sot Papa emëroi
prefekt të ri të Kongregatës për Klerin, kardinalin Klaudio Umes dhe Kryeprift të
ri të bazilikës së Shën Pjetrit, kryeipeshkvin Angjelo Komastri: zënë përkatësisht
vendin e kardinajve Kastrijon Hojos dhe Françesko Markizano. Kardinali brazilian
Klaudio Umes, deri tani kryeipeshkëv i San Paolos, zevendëson Kardinalin Dario Kastrijon
Hojos, që largohet nga detyra për arsye moshe; ndërsa kryeipeshkvi Angjelo Komastri,
deri tani vikar i përgjithshëm për Qytet-Shtetin e Vatikanit, drejtor i Fabrikës së
Shën Pjetrit dhe kryeprift-ndihmës i bazilikës, zevendëson kardinalin 77 vjeçar Françesko
Markizano. Kardinali Umes, 72 vjeç, meshtar françeskan që prej 24 vjetësh,
shuguruar ipeshkëv në vitin 1975, u emërua në vitin 1998 kryeipeshkëv i San Paolos.
U bë menjëherë i njohur për dialogun ekumenik dhe promovimin e laikatit. U shqua posaçërisht
për mbështetjen e punëtorëve dhe të sindikatave, duke marrë pjesë ndër protestat e
punëtorëve si ipeshkëv përgjegjës për punën baritore në gjirin e njerëzve të punës
në Brazil. Është një nga organizatorët e Takimit botëror të familjeve me Papën kremtuar
në Rio de Zhanejro në vitin 1997. I krijuar kardinal nga Papa Gjon Pali II në vitin
2001, luajti një rol të dorës së parë për formimin e meshtarëve dhe për ungjillëzimin
përmes mjeteve të komunikimit. Kryeprifti i ri i bazilikës së Shën Pjetrit, imzot
Angjelo Komastri është 63 vjeç: u shugurua meshtar në moshën 24 vjeçe; në vitet
1996-2005 ishte kryeipeshkëv prelat i Loretos, delegat papnor për Shenjtëroren Lauretane.
Ka qenë edhe kryetar i Komitetit të Konferencës Ipeshkvnore Italiane për Jubileun
e madh të 2000-it. Në vitin 2003 predikoi ushtrimet shpirtërore në Vatikan, në praninë
e Gjon Palit II. Benedikti XVI e ka ngarkuar të përgatisë tekstet e Udhës së Kryqit
2006.