Të krishterët vuajnë më shumë në Irak e lajme të tjera.
(30.10.06 RV) Të paktën 5
atentate sot në Irak. Gjatë shpërthimit të 5 autobombave në zona të ndryshme të
Bagdadit mbetën të vrarë 42 vetë dhe u plagosën rreth 105 të tjerë. Ndërkaq, rifilloi
procesi kundër Sadam Hyseinit e bashkëpunëtorëve të tij mbi masakrimin e 180 mijë
kurdëve në vitet 1987-88. Avokatët e Sadamit u larguan nga salla, kur prokurori refuzoi
12 kushtet e paraqitura prej tyre, për t’u dhënë fund protestave, që e ndërprenë procesin
për 10 ditë. Në situatën e vështirë që përjeton Iraku, të krishterët janë ata
që vuajnë më shumë. Për kushtet e tyre flet sot në mikrofonin tonë gazetari siro-katolik
irakian, Uilliam Uarda, i cili ndodhet në Itali për të marrë çmimin e shoqatës “Siguria
dhe Liria e Informacionit”, me qendër në Sienë: Të krishterët sot në Irak vuajnë
shumë. Janë viktima të kërcënimeve të vazhdueshme, sidomos në zonat e Bagdadit
dhe të Mosulit. Të krishterët po largohen nga këto zona, po zhvendosen drejt veriut.
Pas sulmeve të kohëve të fundit kundër kishave të krishtera në Irak e kundër meshtarëve
lokalë, të cilët rrëmbehen dhe vriten, situata është keqësuar: tani të krishterët
po përpiqen të ikin edhe drejt vendeve të tjera, në Siri, në Jordani, në Evropë. Duhet
gjetur një zgjidhje edhe për ta.
Lula da Silva rikonfirmohet president
i Brazilit. Në ballotazhin e djeshëm, kreu i shtetit fitoi dukshëm me 60% të votave
në krahasim me 39% të kundërshtarit të tij socialdemokrat Xheraldo Alkmin. Rizgjedhja
e tij tregon se gjatë fushatës elektorale, da Silva arriti të bindë atë klasë të mesme,
baraz me një të tretën e popullsisë, që në turnin e parë kishte votuar kundër tij
për shkak të skandaleve të korrupsionit brenda partisë. Lufta kundër varfërisë mbetet
një nga përparësitë e programit të da Silvës.
Normat e reja mbi përmasat
e bagazhit të dorës në transportin ajror do të hyjnë në fuqi më 17 prill të vitit
të ardhshëm, ndërsa nga e hëna e ardhshme vlejnë të gjitha kufizimet përsa i përket
mbajtjes së lëngjeve në avion. Lejohen vetëm 100 ml lëngje, pak a shumë gjysëm gote
ujë. Gjithashtu është e detyrueshme që shishet e përdorura të mbahen në qese të tejdukshme.
Ndërkaq, duke filluar nga 17 prilli 2007, bagazhi i dorës duhet të jetë rigorozisht
me përmasat 56x45x25 centimetra. Më parë ky kufizim ishte vetëm fakoltativ.