Fetë për paqen: 20 vjet më parë, falë intuitës profetike të Gjon Palit II, u kremtua
në Asizi Dita botërore e lutjes për paqen.
(27.10.2006 RV)Fetë në shërbim të paqes: më 27 tetor, njëzet vjet më parë,
Gjon Pali II bënte një nga gjestet më domethënëse të papnisë së tij. Papa Vojtila
mblidhte në Asizi udhëheqësit e feve të mëdha të botës për t’iu lutur së bashku Zotit
që t’i dhuronte njerëzimit pasurinë e madhe të paqes. “Profeci e saktë” e quan Benedikti
XVI në mesazhin për njëzetvjetorin e kësaj Dite, organizuar nga Bashkësia e Shën Egjidit.
Ishte dëshmi korale për paqen – vijon Papa Racinger – që shërbeu për të sqaruar pa
kurrfarë dyshimi se feja nuk mund të jetë tjetër, veçse vazo në të cilën mbin, rritet
e lulëzon gonxhja e paqes, pa harruar se paqja ka nevojë për dashuri të pasionuar,
që lind nga kthesa e zemrës. E kjo dashuri lulëzoi në Asizi, në një ditë dimërore,
kur frynte erë e ftohtë, si lufta që e ndante botën në dy blloqe kundërshtare. E
në sa bota tmerrohej nga rreziku i mundshëm i luftës bërthamore e kërkonte me ankth
një profet, e gjeti atë në Papën polak, njeriun që njohu tmerret e Luftës II Botërore
dhe dhunën çnjerëzore të regjimeve lirivrasëse. Gjon Pali II bëri thirrje - e në Asizi
u mblodhën 12 delegacione, përfaqësues të kristianëve, hebrenjve, myslimanëve, budistëve,
sikhve, induistëve e shintoistëve, të cilët i lartuan në kor Zotit lutjen e pasionuar
për paqe, aq aktuale edhe për ditët tona!